Sairang Village Council hmalaknaa Tlawng kawng chei that chu  tukin zing khan Rural Development Minister Pu Lalruatkima'n a hawng.

Pu Lalruatkima chuan kum a thar angin rilru leh ngaihtuahna thar pu turin mipuite a fuih a, mahni khaw chhunga vantlang bungruate leh kawngpuite chu a neitu khaw mipuiten dimdawi tak leh uluk taka enkawl turin a chah. Kawnpui leh Sairang inkar kawng pawh siam that thuai tum a ni,  Minister hian a ti a. Sairanga Riverine Reserve Forest chungchang pawh sawi langin sawrkarin a tul angin a en nawn ang, a ti bawk. Pu Lalruatkima chuan Mizote chu hnam huaisen leh rinawm ni zel tura fuihin eizawnna kawngah taimak chhuah a tul THU leh zirna ah thahnemngaih leh zual a pawimawh  a ti a, All India Service-a tling thei tur khawpa tang turin zirlaite a fuih bawk a ni.

Minister Pu Lalruatkima chuan RD Department chu mipuite nen in hne renga hna thawktu an ni a, an Department hnuaia hmalaknate hian Mizorama chhungkaw tin deuh thaw a tlawh a, thingtlang mipui eizawnna leh hmasawnna chu a ngaih pawimawh ber niin dik tak leh lang tlang taka, mipuite tana tangkai thei ang bera hnathawh tul a tih thu a sawi a. Sawrkar hnathawkte, khaw tina sawrkar aiawh agency-te leh Village Council-te chu thahnemngai leh zuala hna thawkin turin a fuih a ni. RD Scheme hnuaiah hmasawnna leh eizawnna tam tak neih theih a nih thu sawiin heng scheme atanga mipuiin hamthatna an hmuh thinte chu anmahni tibuaitu leh ti thuanawptu ah hmang lovin eizawnna tling tur khawpa hmang tangkai turin RD Minister Pu Lalruatkima chuan mipuite a fuih a ni.

RD Minister in a hawn tak Tlawng kawng hi PCC Flooring (concrete)-a siam a ni a. Sairang khaw mipuite eizawnna pawimawh tak balu lak te, thlai hnah chi hrang hrang nul atanga an lakna kawng leh hmun dang atanga Sairang Tlawng lui panna kalkawng ber a nih avangin Sairang VC te leh mipui ten kawng tha zawk an neih theih nan MGNREGA leh mipui thahnemngaite sum thawhkhawm hmangin October 2018 atang khan he kawng hi an lo siam tan tawh a ni.

Pu Lalruatkima hi RD Department-a Deputy Secretary Pu CC Lalchhuangkima, DRDA Aizawl Project Director Pu V.Lalengmawia bakah mi pawimawh dang ten an tawiawm a ni.