No.7829/2020-2021

Saitual, 18th March, 2021 : Vawiin chawhnu khan YMA Sub-headquarters, Saitual office sak thar, Saitual Bazar veng ami chu Rural Development Minister Pu Lalruatkima'n a hawng.

Hawnna inkhawmah thu sawiin Minister Pu Lalruatkima chuan Saitual in district an neih atanga reiloteah Sub-headquarters a hlankai an ni leh Sub-headquarters office tha tak an nei nghal chu a lawmpui thu a sawi a. Ram leh hnam chhan tura YMA in thahnemngai taka a thawh thinna ah lawmthu a sawi bawk a ni.

Minister chuan YMA a thawkho thinte chu mahni hamthatna zawng lo leh mahni inhaivur zawnga hma la ngai lo, tlawmngaihna nen midangte tana inphal taka thawk tlang thin an nih avangin an inngaina bik thin a ni, a ti a. YMA a rinawm leh dik taka kan thawh ang hian kan awmna hmun leh kan hnathawnna apiangah rinawmna leh dikna kan ken tlang zel a pawimawh a ni, a ti. YMA chuan tumah thliarhrang lova tanpui ngaite tanpui hi a thupui ber a nih avangin a zahawm a, YMA chu midang chunga leng leh ropui lutuka kan inngaih hi a thiang ve lova, mirethei leh chanhai, chhumchhiaten min thlamuanpui lovang tih hi a hlauhaam ber a, chutiang thleng lo tur chuan fimkhur takin ke pen zel a pawimawh a ni, a ti bawk.

Pu Ruatkima chuan COVID-19 hripui leng kara lungthu pathum - Sawrkar, Kohhran leh YMA te thawhhona a ropuizia hi khawvel hriatpui tlak a ni tiin, Mizoramin harsatna kan tawh laia Zoram pawn hmun hrang hranga zohnahthlak unauten 'eitur lan thar chhuah chhung chu riltamin in awm lovang' an rawn ti te kha a ropuiin, zonun zemawi kan induhsakna leh kan inhmangaihna a par chhuak leh a, kan chhawm nun chhunzawm zrl a pawimawh a ni tiin, Zoram pawna kan unauten harsatna an tawhin anmahni tanpui turin kan tlanchhe bik tur a ni lo, a ti a. YMA thuthlung 'sawrkar ta ka ni a, sawrkar chu ka ta a ni,' tih chu hre reng chungah ram leh hnam chhan kawngah leh hmasawnna hnathawh kawnga sawrkar hmalakna thlawp tlat tur leh tihhhlawhtlinpui tura theihtawp chhuah zel turin a chah bawk a ni.

YMA Sub-headquarters, Saitual hi January ni 22, 2021 khan din niin, an hnuaiah hian Group 5 - Tuiphal, Tuivai, Tuivawl, Tamdil leh Mawmrang a awm a, YMA branch 41 awmin, YMA member 22,275 (Mipa - 12,972, Hmeichhia - 9045, Life Member - 258) an awm a ni.

 YMA Sub-headquarters office  hawnna inkhawm hi an Vice-President Pu R. Lalruatkima'n a kaihruai a, Sub-headquarters Secretary Pu K. Lalthangvunga'n report pe in, Sub-headquarters President Pu C. Lalkima leh Saitual bawrhsap Pu VL Hruaizela Khiangte ten thusawina hun a hmang bawk a ni.