No.7830/2020-2021

Dated Aizawl, the 18th March, 2021: Vawiin khan Animal Husbandry & Veterinary Department Minister Dr. K.Beichhua chuan Epidemiological Centre, A.H & Veterinary Complex, Khatla-ah a hawng. Minister hi Pu C.Lalmuanpuia Vice Chairman, Veterinary, Fishery & Sericulture Board chuan a tawiawm a ni.

Minister Dr. K.Beichhua chuan ran hriselna (animal health) ven himte, ran te hahdam taka an khawsak theihna tur (animal welfare) ngaihtuah leh hriselna atana him, chaw/sa (food safety) thar chhuah te hi  Animal Husbandry & Veterinary Department hnathawh pawimawh berte zing a mi a ni, a ti a. Kan rante an hriselna a that loh chuan mihring pawh kan hrisel thei lo a, ran hrisel nei tur chuan natna chi hrang hrang lak atanga ven a ngai a ni, tiin a sawi a. Minister chuan natna hri laka veng tur chuan hrileng a awm leh awm loh enthlak reng a ngai a, hri leng a awm pawha rang taka hriatchhuah thuai a ngai thin a; disease surveillance plan leh disease monitoring plan tha tak neih a ngai a, chu mai bakah laboratory chang tlung tak neih ngei ngei a tul thin a ni, tiin a sawi a. Mihring natna tam zawk hi ran leh mihringin an inkai chhawn theih (zoonotic) a ni a. Ran hriselna hian thui tak mihring hriselna a nghawng thei a ni, ran hriselna lama hmalakna hian mihring hriselna a khawih tel zel a ni, chuvangin tun hnaiah chuan ran hriselna leh mihring hriselna te hi thil hrang daih anga kalpui lovin One Health approach hnuaiah a kal khawm ta a ni, a ti a. Minister Dr. K.Beichhua chuan vawiina Epidemiological Centre hawn pawh hi ran hriselna lam chauh hmalakna a ni dawn lova, ran leh mihring in kai chhawn theih natna (zoonotic disease) pawimawh tak tak endikna tur hmun anih avangin a pawimawh tak meuh meuh a ni. Ran natna chi hrang hrang len thin dan te, natna darh dan a, a venna lam thlengin he Centre hian hma a la chho dawn a ni, a ti a. PCR hmangin molecular diagnosis te pawh a tih theih dawn a, hei hi A.H & Veterinary Department hlawhtlinna chauh a ni lova, state pumpui tana rotling tur a ni dawn a ni a ti bawk.

Disease hrang hrang control nan Surveillance hnathawh mek reng a ni a, tun dinhmuna disease surveillance hnathawh langsar zual te chu:-

1) Porcine Reproductive and Respiratory Syndrome (PRRS).

2) African Swine Fever (ASF).

3) Avian Influenza (Bird Flu).

4) Bovine Spongiform Encephalopathy (BSE).

5) Glanders

6) Lumpy Skin Disease (LSD) 

Epidemiological Centre hi March ni 11, 2016 khan bultan a ni a, Rural Infrastructure Department Fund- XXI hnuaia hna hi thawh a ni a, RIDF atangin Rs 304.95 lakhs leh state atangin Rs 16.05 lakhs, avaiin Rs 321.00 lakhs-a sak zawh a nih bakah Laboratory bungrua hrang hrang pawh lei a ni. Building hi chhawng thum a ni a, seminar hall, garage leh post mortem room bakah sterilization cum sample processing room, ELISA laboratory, Molecular Unit, ELISA reader room te a awm a ni. 

Epidemiological Centre hawnna inkhawm hi Pi Lalzarmawii, IAS Secretary, A.H & Veterinary Department in a kaihruaia, Dr. Lalhmingthanga Joint Director chuan technical report pe in, Dr. H.Laltlanmawia, Director in lawmthu sawiin he hun hi a khar a ni.