Vawiin khan Rural Development Minister, Pu R.Lalzirliana chuan ‘Leadership Training for Elected Women Representatives’ I&PR Auditorium a neih chu a hmanpui. He training hi Elected Women Representatives (EWRs) – khawtlang hruaitu atana hmeichhe thlan tlinte puala Leadership Training niin, Panchayat Mahila Shakti Abhiyan (PMSA) Mizoram, leh State Institute of Rural Development and Panchayati Raj (SIRD &PR) te tangkawp buatsaih a ni.
Pu R. Lalzirliana chuan Panchayat Mahila Shakti Abhiyan (PMSA) Mizoram, leh State Institute of Rural Development and Panchayati Raj (SIRD &PR) ten training pawimawh tak an buatsaih chu lawmawm a tih thu a sawi a, hmasawn zel thei tura kan inbuatsaihna kawnga thil pawimawh tak pakhat a ni a ti. Rural Development Minister chuan India ramah hmechhiate chawikanna turin nasa taka hmalak a ni a, kawng tinrenga hmeichhiate tel ve theihna tur, thu an neih ve phakna turin Dan te pawh siam a nih chhoh zel thu a tarlang a. Ram inrelbawlna fawng chelhtu zingah pawh hmeichhiate tel ngei ngei tura ruahmanna siam ani zel chu lawmawm a tih thu a sawi a. Women’s reservation hnuaia hmeichhe thlan tlinte chu anmahni in ngainep loa, an quality tha tak - midangte hmangaihna leh midangte dinhmun hriatthiam puina, khawtlang thatna leh hmasawn nana hmang tangkai turin a sawm a. Leadership Training a tel tura kalkhawmte chu an dinhmun sang tak chuan mawhphurhna sang tak a keng a, anmahni thlang chhuaktute mipui zah let a, an duh dan ngaichang thiam tur in a chah a. Pu R. Lalzirliana chuan hruaitu chu mi rinawm leh mahni invawng uluk, hna thawh duh mi, mawhphurhna hlen zak zak mi nih a pawimawh a ni a ti a. Khawtlang hruaitu atana hmeichhe thlan tlin kalkhawmte chu Rural Development Minister chuan an hnathawhna ah hun harsa an hmachhawn pawhin puitling tak, dawhtheih tak leh rilru zau tak pu zel turin a chah a ni.
‘Leadership Training for Elected Women Representatives’ hawnna inkhawm hi Pi Zothankimi, President, Panchayat Mahila Shakti Abhiyan (PMSA) in a kaihruai a, Local Council leh Village Council reserved seat atanga rawn luah tu hmeichhia ten an pawimawhna hre reng a, midang tan a entawn tlak, ram leh hnam tan a mi tangkai nih an tum ngei tur a ni a ti. Hawnna inkhawm ah hian thupui sawi hawnna – Leadership Quality/Style chungchang Pu Khuangthansanga Pakhuangte, Principal (SIRD&PR) in thu a sawi a. Dr. Lalneihzovi, Mizoram University chuan lawmthu sawiin training hawnna inkhawm hun a khar a ni.
‘Leadership Training for Elected Women Representatives’ ah hian khawtlang hruaitu atana hmeichhe thlan tlinte thahnem tak an tel a. Dr. Lalnilawma, HoD, Department of Extension Education and Rural Development, MZU chuan ‘Chak taka pawl hmalakna atana thawhhona hriat tur tul te (Team Building) tih thupui hmangin kalkhawmte training a pe a. Pu David R. Lalthanliana, Lecturer, HSS chuan ‘Pawl chakna tura inbiakpawhna lama hriattur tul te (Communication Skills): Role of Elected Women Representatives’ tih thupui hmangin training a pe bawk a ni.
