Vawiin chawhma dar 10:30 khan ni 4 chhung awh tur Training on Social Audit Under MGNREGA for Programme Officcers’ tih thupui hmanga Secretariat Conference hall, Aizawl-ah SIRD, Kolasib, Mizoram-in buatsaih chu RD Minister Pu R. Lalzirlianan a hawng a, hawnna inkhawm hi Pu R. Lalramnghaka, Director in a kaihruai a ni.

Thusawiin Minister chuan MGNREGS tum pawimawh tak chu retheihna umbo a ni a ti a. Retheihna hi tih tak zeta kan beih loh chuan kan um bo thei lo ang tiin MGNREGS ah hian sum a tam a, hei hi kumkhua a kan chhawr tangkai tur hmasawnna rahbi min tuksaktu tur a ni a, kan hman thiam loh erawh chuan kan tan a pawi a, thil ho mai maiah hman ral a hlauhthawn thu a sawi. MGNREGS chungchang bikah hian tualchhung thuneitute (V/Cs) thuneihna tam zawk pek an niin thup leh zep nei lova langtlang taka hna an thawh theihna turin officers te in pawimawh hle a ni a ti a. Mipuiten neitu rilru an put theihna turin an entawntlaka nuna lang chhuak khawp tura an thawh a ngaih thu a sawi. Central sorkar-in Social Audit Rules chu 30 June 2011 atangin a rawn siam a, He rules ti hlawhtling tur hian Mizoram sorkar pawh a in buatsaih mek tih a sawi a. Minister chuan min hual veltu thing leh mau kan humhalha sik leh sa danglam zel tur veng tura theih tawpa tanlak a tul zia sawiin, Block campus velah te thing leh mau te phun uar deuh deuh turin BDO te a chah bawk.

Training hawnnaa thusawitu dang RD Secretary Pu K. Riachho pawhin India sorkar ropuina pakhat chu mipuite hnenah awlsamna engkim min pek hi a ni a. Chumi denchhen chu ni 100 inhlawhna pek kan ni ta a ni. He ni 100 inhlawhna ah hian engkim mai hi langtlang leh thup awm lo a kalpui tur a ni a. Chumi atana pawimawh ber chu Social Audit hi a ni a, Social Audit hi mipuiten ni 100 inhlawhna chungchangah an chanvo hriatna pawimawh tak a ni, a ti bawk.

He training ah hian Mizoram RD Block tin atangin BDO leh APO te an kal a, ni 2 chhung theory a zirin, chumi hnuah reiek khuaah riak lutin Social Audit an ti nghal dawn a ni. Pu Khuangthansanga Pakuangte, Sr. Faculty, SIRD chuan training hi a pe a ni.