Vawiin khan Rural Development Minister Pu R. Lalzirliana chuan Mamit Chhimveng YMA Hall-ah Mizoram State Rural Livelihood Mission (MzSRLM) a hawng a,he hunah hian Parliamentary Secretary Pu Lt.Col.Z.S Zuala leh Pi Lalbiaksangi District Bawrhsap Mamit bakah RD Department Officer leh District Officer thahnem tak an tel a ni.

Pu R. Lalzirliana chuan thu sawiin MzSRLM thil tum ber chu mi rethei dawmkan ,hmeichhia te chawikan leh kan tu leh fate tana rotling hnutchhiahna tura Sorkar scheme a ni a ti, Mamit District chu Mizoram tan chaw bawm leh Border Trade-ah kawng pawimawh tak la ni turin kan Sorkar chak tak hian hma a la mek a ni a ti a. Minister chuan thiamna chu sum tam tak aiin a tha zawk tiin, kawng dik zawh a sorkar tanpuina kan dawnte tangkai taka hmanga turin kalkhawm te a chah a, mahnia thawh chhuah tumlo a, dawng tur ringawta rilru kan pu thin chu paih bo a hun tawh tak zet a ni a ti, Phailam tharchhuah ring tur chauha khawsa tur kan nilo a ni tih in hre thara mahni ke a ding tura intodelh a, kan ram ngei a atam thei ang ber tharchhuah tum turin kalkhawm te a chah bawk a ni.

Parliamentary Secretary Pu Lt. Col Z.S Zuala pawhin thu sawiin, vawiin ni hi Mamit mipui tan thil chhinchhiahtlak tak a ni tiin, mirethei chawikan nana Sorkar Policy duan chu a tangkai thei ang bera chhawr turin kalkhawmte a chah a ni.

Pi K. Lalrinzuali RD Department Jt. Secretary & Mission Director MzSRLM in scheme chungchang sawi hawnna hun neiin tunah hian Mizoram a Block paruk(6) hawn belh tum mek a ni a, chung zinga block pahnih chu Mamit District huam chhung a awm tur a nih thu sawiin BDO te hnathawh mipuiten tawiawm thin turin a fuih. SHG din dan tur ah zirtirna hun hmang nghalin, a kimchanga zirchianna nei turin mithiam ten an chamchilh dawn thu a sawi.

MzSRLM Chief Operating Officer Pu Vanlalroluahpuia’n kalkhawmte Mission chungchang zirtirna leh a thil tum hrang hrangte hrilhhriatna nei nghalin MzSRLM tum ber chu hmeichhe chawikanna turah Self Help Group (SHG) din leh awlsam zawka Loan hmuh bakah eizawnna ngialnghet nei tura thiamna neih tir a ni a ti.

He Programme hi Mamit DRDA Project Director Pu R. Vanlalsawta’n kaihruaiin Pi Lalbiaksangi District Bawrhsap-in inlawmna thuchah sawiin Pu H. Lianzela, Addl. DC Mamit chuan lawmthu sawina a nei bawk.

Home Minister hi tukin zing dar 11:00 ah Tourist Lodge ah Guard of Honour nen Mamit District Bawrhsap Pi Lalbiaksangi leh District Officer ten an lo dawngsawng a, vawiin hian Mamit-a Office hrang hrang tlawh kualin naktuk hian Mamit District Jail, Hmunhlui Tlang a mi a tlawh bawk ang.