Vawiin chawhnu khan Health Minister Pu Lal Thanzara chuan Dr. Ambedkar Medical Aid Scheme hnuaia damlo pahnih leh Rashtriya Arogya Nidhi hnuaia damlo pakhat tena an dam lohna avanga inenkawlna sum he Scheme pahnih kaltlanga tanpuina an dil, cheque a rawn thleng chu a Office ah damlo chhungte hnenah a hlan a ni.

Pu Lal Thanzara chuan Dr. Ambedkar Medical Aid Scheme leh Rashtriya Arogya Nidhi kaltlanga damlohna thenkhata inenkawlna sum, damlo tena an dil hi Mizoram ah chuan a hlawhtlinna hmasaber anih thusawiin natna khirh tak takah inenkawlna a hautaka chuvangin heng natna khirh bikah te hian mi tam zawkin he Scheme hi hria a, tanpuina dilna chang hria a he scheme hmang tangkai se tih a duh thu a sawi a ni.

Health Minister Pu Lal Thanzara hian Pi Lalthasangi, Chhiahtlang, Kal natna vei chhungte hnenah cheng 3,39,748 leh Pi Lalfakzuali, Chhiahtlang, Kal natna vei chhungte hnenah cheng 3,25,112.69 cheque-in a hlan a. Anni hi Dr. Ambedkar Medical Aid Scheme kaltlanga damlo inenkawlna tanpui na dawng an ni a. Pu Lal Thanzara hian Pi Laltlankimi, ruh natna vei hnenah Rashtriya Arogya Nidhi hnuaia damlo inenkawlna tanpuina cheng 2,00,000 a dawn pawh cheque-in a hlan bawk a ni.

Dr. Ambedkar Medical Aid Scheme in a tum ber chu BPL chhungkua emaw, Sawrkar hnathawh neilo chhungkua emaw, kum khata nuai 1 la lut lo ten natna khirh an vei palha an inenkawlna atana tanpuina pek a ni a. He Scheme hian lung zai (heart surgery) ah cheng 1,25,000 thleng; kal natna/dialysis ah cheng 3,50,000 thleng; Cancer surgery/chemotherapy/radiotherapy ah cheng 1,75,000 thleng; thluak zai (brain surgery) ah cheng 1,50,000 thleng; Kal leh taksa peng thlak (kidney/organ transplant) ah cheng 3,50,000 thleng; Spinal surgery ah cheng 1,00,000 thleng leh Nunna atana natna hlauhawm dang ah cheng 1,00,000 tanpuina a dil theih a ni.

Rashtriya Arogya Nidhi hi BPL chhungkua tan bik a dil theih a, cancer leh nunna tana natna hlauhawm leh khirh bik veite inenkawlna atan a dil theih a. BPL nilo emaw Sawrkar hnathawh nei lo chhungkua emaw tan Health Minister’s Discretionary Grant Scheme katlangin natna thenkhata damlo inenkawlna atan tanpuina a dil theih bawk a ni.

Heng Scheme form te hi Civil Hospital, Aizawl ah a lak theih a, damlo te hi Sawrkar damdawi inah ngei an inenkawl tur a ni a. An inenkawlna senso zawng zawng hi doctor ten an certify hnuah an dilna te chu thehluh chauh tur a ni a, pawisa bang awm chuan a petu (agency) hnenah kir leh thlap a ni.

Dr. Ambedkar Medical Aid Scheme hnuaia hian damlo dang 3 in an inenkawlna sum an dil chu hmuh a ni a, mahse bank clearance la tihfel loh vangin vawiin khan hlan hman an nit a lova, hun remchanga la hlan tur an ni.

Vawiina heng Scheme hnuaia tanpuina semna ah hian Health & Family Welfare Department, Principal Director Dr. K. Ropari leh a thawhpuite bakah Civil Hospital, Medical Superintendent te an tel a ni.