543/2025-2026

Dated Aizawl the 23rd May, 2025: Vawiin khan Helen Lowry Higher Secondary School chuan an zirlai naupang 2024-25 academic session-a pawl 10 leh 12 result chhuaka hlawhtlinna changte chawimawina hun chu Helen Lowry Auditorium, Seventhday Tlang, Vaivakawnah an hmang a. He hun hi Rural Development & Administration Department Minister, Prof. Lalnilawma chuan khuallian niin a hmanpui.

He hunah hian khuallian Minister Prof. Lalnilawma chuan lawmpuina leh fuihna thute sawiin, zirlaite chu an hma hunah hlawhtlinna chang zel tura duhthlanna dik siam zel turin a chah a. Hlawhtlinna chang zel turin rilru put hmang dik (positive attitude) neih tum tlat zel tura fuihin, vawiina an duhthlanna siam chuan nakin thlenga an dinhmun tur a hril tih hre reng turin a chah bawk a. Zirlaite hlawhtlinna phena zirtirtute inpekna chu fakawm a tih thu sawiin result tha tak nei chhunzawm zel turin Helen Lowry School chu duhsakna a hlan nghal a ni.

Khual zahawm Pu Lalnilawma Colney, Education Director, MizoConference, Seventhday Adventist pawhin zirlaite fuihna thu sawiin, chhia leh tha hriatna thiang tak hmanga duhthlanna dik siam thin turin zirlai kal khawmte chu a chah a ni.

Vawiina hun hman hi Pu Lalhmachhuana Pachuau-in  kaihruaiin, kalkhawmte lawmna thu a sawi a. Helen Lowry Higher Secondary School Headmaster hnen atangin school chungchang report ngaihthlak niin, mi hrang hrang hnen atangin thusawi ngaihthlak a ni a. Hei hi Zirlai hlawhtlinna changte hnena Certificate semna leh zirtirtu leh zirlai tha zualte chawimawina in a chhunzawm a. Pu Lalbiakdika Ralte, Treasurer, Mizo Conference, SDA chuan malsawmna in hun hi a khar a ni.