375/2026-2027

Dated Aizawl: the 05 May 2026 : Vawiin khan Rural Development & Administration Department changtu Minister Prof. Lalnilawma chuan I&PR Auditorium, Treasury Square-ah, , Mizoram Board of School Education -in kumin 2026 Higher Secondary School Leaving Certificate (HSSLC) result a tihchhuah taka science, arts leh Commerce stream-a pakhatna theuhte chawimawina hun MZP buatsaih chu khuallian niin a hmanpui a; topper-te hi chawimawina leh lawmpuina thilpek a hlan nghal bawk a ni.

He hunah hian khuallian RD&A Minister Prof. Lalnilawma chuan thusawiin, MZP-in zirna kawnga tithate chawimawina hun a buatsaih thinh chu lawmawm a tih thu a sawi a. Topper-te chu inthlahdah mai lo tura fuihin, sang tak an thlen tawhna chu a aia sang zawk thlen theitu a ni tih hria a, tang mar zual sauh sauh turin a chah a. Vawiina an thil tawn chu duhthlanna dik an hman vanga an thlen a ni tih hre tel tura chahin, an hma hunah pawh duhtlanna dik pawimawhzia chu hre reng turin a fuih bawk a. Zirlai kalkhawmte chu, mahni zawn theuhvah hmasawn tum a, hlawhtlinnachang chho zel turin duhsakna a hlan nghal a ni.

MZP General Headquarters President, Dr. C. Lalremruata leh Pu Lalhruaitluanga Chawngte, Advisor, MZP General Hqrs-te pawhin Zirlaite fuihna thu sawiin, ram leh hnam tana chhenfakawm tak nih tum theuh turin zirlai kalkhawmte chu an chah a. Pu Lalhruaitluanga chuan hnam rilru put pawimawhzia leh lehkhabu chhiar pawimawhziate hmanga zirlaite fuihna thu chahin, Dr. C. Lalremruata chuan Zirlai kalkhawmte chu kohhran leh khawtlang bakah, ram inrelbawlna leh thil pawimawh hrang hrangte, zir chianga hre ve zel turin a chah a. Ram leh hnam chu an kut zala la tla thei reng a ni tih hre turin a fuih a, an kal zelna turah duhsakna a hlan nghal bawk a ni.

Vawiina hun hmannaah hian MZP Gen Hqrs hruaitute leh St. Paul's HSS zirlai thenkhatte bakah mi pawimawh sawm bikte an tel a. Hun hi  Pu Sanghmingthanga, Vice President, MZP Gen Hqrs-in kaihruaiin, Pu C.  lalhmingsanga, General Secretary, MZP General Hqrs chuan  inhmelhriattirna neiin,  MBSE-in  HSSLC result a tihchhuah tak nikum leh kumin a mite zirchianna report a pe a. Hemi zawh hian Zirlai  tithate chawimawina hun chu Pu Lalentlinga, Asst. Secy, MZP Gen Hqrs kaihhruaiin hman a ni a. Thusawi ngaihthlak a nih hnuah, Pu Rothanliana, MZP Gen Hqrs Treasurer chuan lawmthu sawiin  hun hi a khar a ni.