2336/2026-2027

Dated Aizawl, the 24th September 2026: Vawiin khan Rural Development & Administrative Department Minister Prof. Lalnilawma hovin I&WR Conference hall-ah VB G RAM G leh Scheme dangte thlunzawma, department hrang hrangte inkara thawh hona tha zawk a awm theih dan tur chungchang sawi hona ‘Convergence Workshop’ neih a ni a, RD&AD hotute bakah Scheme hrang hrang kalpui thin department hrang hranga hotute an tel a ni.

Minister chuan VB G RAM G hnuaiah Convergence chu thil ngaih pawimawh berte zinga mi a nih thu a sawi a; RD&AD department chu department hrang hrangte thawh ho pui tura an inhawn reng thu sawiin, hna thawh dan tur ruahmanna ‘Viksit Gram Panchayat Plan’, October thla atanga siam turah pawh department hotute chu ruahmanna leh rawtna te thlena, tel (participate) vek turin a sawm bawk a. Thingtlang (village level) atanga ruahmanna fel tak siam a pawimawh thu sawiin, ‘Aizawl khawpui chauh kan tih hmasawn a, thingtlang khuate kan hlamchhiah leh si chuan, viksit bharat kan thleng thei ngai dawn lo’ a ti a, hemi atana pawimawh ber chu thawh hona (convergence) tha neih leh thawktute inpekna a nih thu a sawi. Official-te fuihna thu sawiin hna thawhna tura state-in sum kan hmuhte hi a tlem lo hle a; chuvangin hmasawnna hna kan thawhte leh kan sum hmannate hi a inmil em tih hi inzawh fo a pawimawh dawn a ni’ a ti a, thawh hona tha lehzual hmangin Mizoram tan hmasawnna nasa tak thlen theih a nih tur thu a sawi.

Vawiin hun hmannaah hian Pu R. Lalchhanhima'n kalkhawmte lawmna thu a sawi a; RD&AD Deputy Secretary Pu Lalvenhima’n VB G RAM G hnuaia hna thawh theih chi hrangte sawiin, Additional Secretary Pu V. Lalengmawia’n Scheme dangte nena inthlunzawm theih dan a sawi bawk a. Chawhnu lamah sawi hona hun hman leh niin RD&AD Under Secretary Pu Denny Lalchhuanawma’n lawm thu sawiin hun a khar a ni.

VB G RAM G hnuaiah hian hna thawh theih (permissible work) chi hrang hrang 375 awmin Categoy – 4: Water related (128 works), Core Rural Infrastructure(111 works), Livelihood related Infrastracture (98 works) leh Disaster Preparedness & Extreme Weather Mitigation (38 works) ahte then hran a ni a. Mipuite tan ni 125 inhlawhna a awm tawh dawn bakah, hna chi hrang hrang, department hrang hrangte’n mahni puala an lo thawh thinte kha VB G RAM G hnuaiah chuan tangruala, thawh ho dan kawng zawn zel a ni dawn a ni.