2801/2025-2026

Dated Aizawl, 6th January 2026: Vawiin khan Prof. Lalnilawma, Minister of State for Rural Development & Administration Department hoin MGNREGA (Ni 100 inhlawhna) thlaktu tur Vikshit Bharat – Guaranteed Rozgar & Ajeevika Mission (Gramin) Act 2025 (VB – G RAM G Act 2025) chungchang Department hotute nen sawi hona leh zir hona hun hman a ni.

RD&AD Minister Prof. Lalnilawma chuan VB – G RAM G Act hi Dec 21, 2025 khan Central sawrkarin Gazette hmangin a chhuah thu a sawi a, State tinte chu anmahni State te tan thla ruk chhunga Scheme buatsaih tura tih an nih angin, Mizoramah pawh RD&AD hmalaknain ‘Mizoram VB – G RAM G Scheme 2026’ ruangam chu duan nghal a nih thu leh peih fel a nih tawh thu sawiin, tun Budget Session lo awm turah he Scheme hi Legislative Assembly-a pharh hman ngei a nih tur thu a sawi a ni.

Minister hoa sawi hona leh zir honaah hian Pu V Lalengmawia, Additional Secretary, Rural Development & Administration Department chuan powerpoint presentation hmangin VB – G RAM G dan thar hi a sawi fiah a. VB – G RAM G hnuaiah chuan sawrkar kum khat chhungin thingtlang mipuite hnenah ni 125 tal inhlawhna pek a nih tur thu te, MGNREGA hnuaia mipui inhlawhna (Wage Component), Central sawrkarin 100% funding a pek thin ang chu 90:10 sharing pattern a nih tawh tur thu te, sawrkar kum khat chhunga mipui inhlawhna Labour Budget hmang-a pek thinte pawh normative allocation hmang-a State tina sum pek a nih tawh tur thu te, thingtlang loneitute’n an buh tuh leh buh seng buai laia anmahni hna-a an inpumpek theih nan kum khatah ni 60 chhung tal VB – G RAM G hnuaia hna thawh tur chawlh a nih tur thute leh VB – G RAM G hnuaia hnathawh tur reng reng chu Vikshit Gram Panchayat Plan-a thun vek a, Block leh District-a pawm a nih hnuah State Sawrkarin pawm ve lehin, Viksit Bharat National Rural Infrastructure Stack-a thun luh te chauh hna thawh theih a nih tur thute sawi a ni.

He sawihona leh zirhonaah hian, Pu R Zarzosanga, Commissioner & Secretary, Rural Development & Administration Department leh officer dangte pawh an tel a ni.