2800/2025-2026

Lunglei, 2026 Pawlkut thla ni 6: Vawiin khan January ni 15, 2026-a Mizoram district khawpui tina lirnghing avanga chhiatna thlen thulha chet lak dan tur en chhinna (state level mock exercise on earthquake disaster) buatsaih tur atana inrawn khawmna leh inhrilh hriatna hun, 'orientation & coordination conference' chu National Disaster Management Authority (NDMA) aṭanga buatsaih niin, Mizoram State Disaster Management Authority (SDMA) leh district tina district disaster management authority (DDMA) te'n mahni hmun ṭheuh aṭangin biakhmuhtheihna (video conference) hmangin an chhim a. Lunglei District-a DDMA member-te leh a kaihhnawih official-te pawhin Bawrhsap & DDMA Chairman Pi Navneet Mann hovin DC Office-a Video Conference Hall aṭanga chhimin, Lunglei District bika hma lak dan tur an sawi ho nghal.

State level mock exercise orientation & coordination conference-ah hian Mizoram Sawrkara Disaster Management & Rehabilitation Department Secretary Pu Udit Prakash chuan hawnna thu a sawi a. NDMA-a Senior Consultant (ME & IRS) Brig. Ravinder Gurung (Retd) chuan state level mock exercise buatsaih tur atana inbuatsaih dan tur leh chet lak dan tur hrang hrang chu presentation hmangin a sawi fiah a. Sawi hona hun hman a ni bawk.

Hemi hnu hian Bawrhsap Pi Navneet Mann kaihhruaiin Lunglei District-a hlawhtling taka mock exercise buatsaih a nih theih nana mihring leh hmanraw ruahman dan tur leh thil pawimawh hrang hrangte sawi ho zui a ni a, mawhphurhna hrang hrang inbel a ni.

Lirnghing vanga chhiatna a lo thlen thulha rang taka chhanchhuah hna leh mipuite venhim hna kalpui a nih theih nan leh nunphung pangngai a awm leh thuai theih nana sawrkar kutkete inralrin dan en chhinna leh chuti ang huna chet lak dan tur nunchan zirna, mock exercise hi January ni 15, 2026 (Ningani) khian Mizoram district hmunpui zawng zawngah a rual tlanga buatsaih tura ruahman a ni a. Lunglei District bikah chuan Lunglei khawpui chhungah lirnghing vanga chhiatna thleng anga nunchan zirna tur hmun pahnih (sawrkar office leh mimal chenna in) ruahman chhin niin, chhun lamah a pahnihah leh zan lamah mimal chenna in bikah chauh chhiatna thleng anga nunchan zir a ni dawn a. DC Office leh a chhehvelah te rorelna hmunpui (district emergency operation centre), innghahna hmunpui (staging area) leh chhawmdawlna buk (relief camp) te buatsaih tura ruahman niin, Civil Hospital Lunglei chu hliam tuarte enkawlna hmun atan ruahman tum a ni bawk.

He mock exercise buatsaih tur atana mawhphurhna hrang hrang neite chet lak dan tur inhrilhfiahna leh inzirtirna, table top exercise chu state pum huapin January ni 13, 2026 khian buatsaih tura ruahman a ni.