2599/2025-2026

Dated Aizawl, 10th December 2025: Vawiin khan Rural Development & Administration Minister Prof. Lalnilawma chuan MzSRLM leh SELCO Foundation te thawh hona hnuaia hmalakna peng pakhat atan Solar Sprayer a sem chhuak. Solar Sprayer semna hun hi Minister Chamber-ah buatsaih niin, Rural Development & Administration Minister Prof. Lalnilawma chuan loneitu mi 11 thlan chhuahte hnenah Agricultural Solar Sprayer hi a hlan a ni.

Minister Prof. Lalnilawma chuan nizung chakna hman tangkai a pawimawhzia sawiin, ram changkang leh ram hmasawn apiangin solar energy pawimawhzia hi an hria a, a hman tangkai dan hrang hrangte pawh tunlaia khawvelin a zir nasat leh ram ropuite pawh an intlansiakna pui berte zinga pakhat a nih thu sawiin Mizoramah pawh solar energy hi hmang tangkai deuh deuh tura hma lak mek zel a nih thu a sawi a. Solar energy lam buaipuitu SELCO Foundation te nen pawh thawh hona kalpui mek a nih thu sawiin, solar technology hrang hrangte hmang hian thingtlang lama kuthnathawktu te, self-help group te, loneitute leh sumdawng hrang hrangte pawhin hmasawnna hmel an hmuh chhoh zela, an sum deh chhuahte pawh a lo pun deuh deuh theih nan RD&AD Department chuan theihtawp a chhuah zel tur thu a sawi bawk a ni.

MzSRLM leh SELCO Foundation te hian April 2025 khan thawh hona thuthlung (MOU) an ziak a, vawiina loneitute hnena solar sprayer sem takte pawh hi, he thawh hona kal zela hmalakna pakhat a ni. He thawh hona hian a tum ber chu, loneitute leh ei zawnna hrang hrang kalpuitute tana ni zung chakna (solar energy) hmang khawl chi hrang hrang - solar dryers, solar sprayers, deep freezers, tailoring units, handloom lighting systems leh a dangte hmang tangkaia, an dinhmun chawisan leh tanpui te a ni.