2600/2025-2026

Mualvum, December 10, 2025: Vawiin khan 1st India Reserve (IR) Battalion, Mualvum-a officer leh thawktute chuan mi harsate puihna turin an thawhkhawm sumfai Rs. 17,210/- chu Joint YMA, Kawnpui hruaitute hnenah an hlan.

He tanpuina sum hlanna hun hi 1st IR Bn Commandant Office Chamber-ah neih a ni a. Pu MS. Dawngkima, MPS, Commandant, 1st IR Bn chuan thawktute aiawhin Joint YMA, Kawnpui hruaitute hnenah sum fai hi a hlan a ni. Vawiina tanpuina hlan tak hi 1st IR Bn, Mualvum-a thawktuten an remchan dan ang theuhva tlawmngaihna an lantirna atanga an thawhkhawm a ni.

Joint YMA, Kawnpui hruaitute chuan 1st IR Bn hnen atanga tanpuina sum an dawn te chu an huamchhung a mi harsate leh mamawhtu bik nia an hriatte hnenah an hlan chhawng leh dawn a ni.

Vawiina tanpuina sum hlanna hun hi Pu Lalthianghlima, MPS, Adjutant, 1st IR Bn chuan tawngtainain a khar a ni.