2601/2025-2026

Lawngtlai, 10th December 2025: Vawiin khan Pu Donny Lalruatsanga, District Election Officer (DEO) chuan LADC-MDC inthlan zawhfel tak chungchangah chanchinbu mite a Office Chamber-ah a kawm.

Pu Donny Lalruatsanga chuan kalkhawmte hnen a lawmthu sawina a nei hmasa a. State Election Commission (SEC) kaihruiana hnuaiah inthlanna tluang taka neih a nih thu a sawi a. Inthlanna turah duty tur mamawhna a sang em em a, State sawrkar hnuaia hnathawkte bakah District Council - a Executive Secretary leh a thawhpuite inpekna a ropui hle tiin, an chungah lawmthu a sawi a. DEO chuan ralmuang taka inthlanna a awm theih nan a Superintendent of Police leh a thawhpuiten theihtawp an chhuahna fakawm a tih thu a tarlang a. Inthlanna felfai leh muanawm tak a awm theih nân MPF, CYLA leh NGO- te atangin thawhpuina tha tak a awm tih tarlangin, an thawhrimnaah lawmthu a sawi a ni.

DEO chuan Model Code of Conduct- tha tak a kalpui a nih thu sawiin, Political Party - ten thu an awih hle a ni, a ti. Thuthar thehdarhtuten theihtawp an chhuahna fakawm a tih thu tarlangin, chanchin thar thehdarh kawnga an inpeknaah lawmthu a sawi a. LADC mipuiten inthlanna ngaipawimawh a tha taka vote an thlak naah lawmthu a sawi bawk.

Pu Donny Lalruatsanga chuan Hmawngbuchhuah bikah Ni 29 November, khan Pu Lalnunpuia (Nodal Officer) leh Security - te kalin, vote pakhat nei chu postal ballot - hmanga vote thlak tir a nih thu a tarlang a. Vanduaithlak taka Polling Officer- pakhatin nunna a chân chu pawi a tih thu sawiin, ex- gratia pek a nih theih nan theihtawp chhuah a nih thu a sawi a ni.

Vawiin hun hmannaah  hian Pu David Lalrinawma (Returning Officer) Pu H. Zonunmawia (Returning Officer) leh Mizoram Journalist Association (MJA) Lawngtlai, te an tel thei a.  MJA Lawngtlai te chuan inthlanna felfai leh tluang tak a neih a nih theih nana District Election Officer leh thawhpuite inpekna leh hnathawh fakawm an tih thu an sawi a ni.