2602/2025-2026

Lunglei, 2025 Pawltlak thla ni 10: Vawiin khan Administrative Training Institute (ATI), Aizawl leh Mizoram State Legal Services Authority (MSLSA) ṭang kawp huaihawtin Lunglei Convention Centre-ah sawrkar hna thawkte tan dan hriatna lama intuai tharna, "Special Awareness Campaign on Legal Provisions & Matters for Government Officials of Mizoram" buatsaih a ni.

He hun hi Lunglei District Additional Deputy Commissioner Pi Zoramdini chuan hmanpuiin, hawnna thu a sawi a. Tun laiah mipui an bengvar tawhin sawrkar hna thawkte laka an dikna leh chanvo nawr chhuah nachang an hre tawh a, dan dik lo deuhva sawrkar hna thawkte hruai sual tum te pawh an awm thei tih sawiin, chuti ang kawnga harsatna awm thei pumpelh tur chuan sawrkar hna thawkte'n dan kan hriat a, kan hman thiam a ngai, a ti a. Dan ang lova thil tih lakah fimkhur a ngaih thu te, fimkhur turin dan hriat a ngaih thu leh dan hre turin zir chian peih a ngaih thu te sawiin, dan anga khinna chhan danah fimkhur a ngaih thu te, mipuite mamawh pek kawngah vuivaina a awm loh nan hma lak a, vuivaina awmte ṭha taka ching fel turin hma lak a ṭul thu te a sawi a. Training-a telte chu an thil zirte uluk taka zir a, sawrkar leh mipuite tan hmang ṭangkai turin duhsakna a hlan.

ATI-a Deputy Director (Training) Pu Lalbiakenga chuan hun kaihruaiin, sawrkar hna thawkte tana dan hriatna lama intuai hriamna chu Mizoram district hrang hrangah buatsaih tum a nih thu a sawi a. Sawrkar hna thawkte tan dan hriat leh dan zawm a ṭulzia inzirtir nan te, dan hriat loh leh zawm loh avanga harsatna thleng ṭhin pumpelh nan te, dan hriat loh avanga sawrkar sum leh tha luang ral ṭhin ven nan leh sawrkar hna thawkte thinlung leh nungchanga dan zawm duhna a beh tlat theih nana inzirtir nan te special awareness campaign chu buatsaih a nih thu a sawi.

Training-ah hian Lungleia sawrkar office hrang hrang aṭangin officer leh staff-te an tel a. Chief Judicial Magistrate Pu Lalramsanga, Senior Civil Judge & Lunglei DLSA Secretary Pi Lalthansiami Hnamte, Public Prosecutor-cum-Government Advocate Pu Malsawmdawngliana leh Advocate Pu ZD Lalnunsanga te'n sawrkar hna thawkte tana dan hriat tur pawimawh hrang hrang – Writ Petitions (including Appeals, Contempt Cases and Para-wise comments); Child Laws: POCSO & JJ Act; General Principles/Legal Maxims/Doctrines in Law; Social Media Ethics leh ADR (Alternate Dispute Redressal)/Legal Services te an zirtir a. Zawhna leh chhanna leh sawi hona hun hman ni bawkin, Lunglei Sub-Deputy Commissioner Pu H. Lalthlengliana'n kharna thu a sawi.