2603/2025-2026

Dated Aizawl, 10th December 2025: India rama sawrkar damdawi in ṭha bik tehna, National Quality Assurance Standards (NQAS)-ah HWC-Primary Health Centre pathum – South Lungpher PHC, Bungtlang South PHC, leh Tipa PHC te an tling thar a, heti hian Mizoram chhunga HWC-PHC 57 target awm zinga 43-in National-level NQAS certificate an nei tawh a ni. Tun dinhmunah Sawrkar damdawi in 57 te’n NQAS national-level certificate nei mekin sawrkar damdawi in 16 leh HWC Sub-Centre 31 ten national-level assessment an dil leh mek a ni.

Dr. Lily Chhakchhuak, Mission Director, NHM, Health & Family Welfare Department chuan India rama damdawi in ṭha tehna NQAS national-level endiknaa tling thar South Lungpher PHC, Bungtlang South PHC, leh Tipa PHC te hian a tehnaah 86.10%, 87.86% leh 90.90% te an hmuh thu a sawiin he dinhmun thleng thei tura thawktu State Quality Assurance Unit te, District Quality Assurance Unit, Lawngtlai leh Siaha District-a Sr. CMO, DPM leh Staff zawng zawng te, Dr. Zoliana Varte MO, South Lungpher PHC, Dr. Lalramchhana, MO, Bungtlang South PHC leh Dr. Vanlalruata Khiangte, MO, Tipa PHC leh an thawhpui Staff Nurse, BAM, Health Supervisor, Lab. Technician, Optometrist leh staff zawng zawng te, khawtlanga an thawhpui RKS/JAS Chairman leh member zawng zawng te, an bial chhunga ASHA zawng zawngte thawhrimna chu fakawm a tiin lawmthu a sawi a. Heng NQAS certified sawrkar damdawi in kan neih takte hi mipuite’n ṭangkai taka hmang tura chahin duhsakna a hlan a ni.

National Quality Assurance Standards (NQAS) certified damdawi inte hi endikna chhawng thum paltlang an ni a, a tawp bera endikna an hmachhawn hi National External Assessment a ni a, state pawn aṭangin Assessor (endiktu) an lo kal ṭhin a ni. Hetah hian a tehnaa 70% an hmuh tlin chuan certified an ni chauh ṭhin. Heng certified tawh damdawi inahte hian natna darh thei ven kawngah te, thawktu zawng zawngte’n an hna bil an thiamna te, an level zelah enkawlna an pek ṭhat dan te, a thlawna enkawlna leh damdawi pek te, damdawi in faina leh dik taka damdawi in bawlhhlawh sawngbawl te, hawihawmna leh a chhehvel vawnfai kawngah te, environment vawn ṭhat kawngah te, khawtlang nena an thawh hona that leh that lohte endik an ni.