2604/2025-2026

Aizawl: the 10^th December, 2025: Vawiinah khan Planning & Programme Implementation Department hnuaia State Institute for Transformation (SIT), Mizoram chuan NITI Aayog’s State Support Mission hmalakna peng pakhat atan Mizoram Assembly House Conference Hall-ah “Transformed Mizoram Vision 2047 Roadmap Workshop” a buatsaih a. He workshop-ah hian Mizoram Chief Minister Pu Lalduhoma,  DP&AR Minister Pu K.Sapdanga leh Minister dangte bakah Chief Secretary, Heads of departments te leh  Department hrang hranga Senior officer te, District bawrhsap te leh sawmbik te an tel a. Vawiin workshop hian  ni leng (9:30am-5:30Pm) a awh a,  India ramin kum 2027 a ral hma a, ram changkang (developed country) zinga inhlankaih ve tuma hmasawnna beihpui a thlakna Viksit Bharat @2047 tin zawna Mizoram state in “State’s long-term development” kawng a sial dan tura ngunthluk taka zirhona leh sawihona “high-level exercise”  workshop a ni. A chhimtu Officials te leh sawmbik te atanga thlirin vawiin workshop-ah hian Mizoram sawrkar pumpui leh mizoram mipui in an chhim ang  a ni.

Workshop hawnna thuchah sawiin, Hon’ble Chief Minister Pu Lalduhoma chuan vawiinah hian Mizoram  hmalam hun (future) chungchang sawiho tura kan ni a,  future kan sawi dawn chuan hmathlir( Vision) atanga kan tan a ngai.  Kan vision chuan a hawihlam (direction) min kawhhmu anga, tih tur leh tih loh tur te bakah kan resources neichhun te thiam taka hman dan tur min kawh hmu ang.

Khawvelah hian eng ram mah hi developed sa a pianga awm lo, Development hi tihpalh thilthua lo awm pawh a ni lo, Kum tam tak  sawkar leh ram mipui ten hmathlir Vision neia an lo thawhchhuah rah a ni zawk thin.

Mizoram te ang, State lian lo, tlangram chhengchhia a awm, mawi si, a mi chengte lehkha thiam,taima leh talent nei tha bawk si tan phei chuan Vision tha neih hi a pawimawh leh zual a ni.

Mizoram hian hun kal tawhah harsatna tam tak : rambuai, covic hripui leng, khuarel chhiatna hrang hrang leh thil dang te lo pal tlang tawha,  chuti chung chuan hmasawnna rahbi pawh nasa takin a tuk ve mek zel a ni. Amaherawh chu kan duh ang leh tum ang hmasawnna erawh kan la nei lo tih chu kan pawm tlan ngam a ngai thung ang. India in kum 2047 ral hmaa ram hmasawn te( developed countries) zinga inhlan kai ve tuma beihpui a thlakna Vikshit Bharat @2047 zin kawngah hian Mizoram pawhin zinkawng thui tak kan hmabak a, kan tih hmasak tur chu: governance leh delivery-ah hma kan sawn a ngai, chumi tur chuan, productive sectors heng: Agriculture and allied activities, industries,tourism, leh digital economy-ah te hma kan sawn a ngai a, chu chuan kan thalai te tan sum lakluhna leh employment a siam dawn a ni.  India ram leh india ram pawnlamah pawn hna zawng thei tura kan thalai ten innovation and technology-a thiamna (skills) an neih theih nan quality education and training hmang te a tahhriam an ngai.

State, district leh local bodies te inkar tawhhona tihchak a, a mal ang ni lova, team anga chak taka thawkho thiam dan ngaihtuah a tul hle bawk.

Kan thiltih dan leh chinthan (actions and habits) in min tichak lova, mi dang laka min innghat tir tlat chuan, kalsan ngam a ngai a. Thutlukna siam tlai lutuk thin te, bawhzuina awm thin lo te, changes hrim hrim doh tlat duhna te pawh kan bansan a ngai.

Transformation hi programme thar siam ringawt  a ni lo, a tha lo a kalsan ngam tura huaisenna nei te hi a ni. Mizoram tih hmasawn nana workshop  pawimawh tak mithiam rual kalkhawmin in duan mek lai hian kan Mizo identity innghahna tlawmngaina te, kan rinna te, kan hnam nunphung leh ziarang te hi kan hmasawnna chuan mausam lo se, kan hmasawnna chuan khawvel hmasawn te rualin ke min pen tir se, kan identity ti nghet zual sauh zawk  rawh se.

Vawiina local khawm ten heng hi inzawt theu u la ka duh: Mizoram hi kum 2047-ah eng angin nge hmuh i duh? Chumi tur atan chuan enge vawiinah kan ti tan nghal ang? Enge kan tih chhunzawm lovang? Engtin nge tha zawka kan thawhho thei ang? ti hi. Vawiina kan Vision 2047 workshop hi Paper-ah chauh tawp lo se, kum tina kan zawm theih tur roadmap,priorities leh timelines felfai tak duan chhuah nan ni se, Bana inkaiha, hmalam kan pan dun chuan kum 2047 ral hma ngeiin, hnunglam kan thlir let hunah vawiin workshop hian “ka mawhphurhna ka ram leh ka fa te tan ka hlen ve e”  min tih tir theih theuh nan duhsakna ka hlan a che u a, a ti.

Vawiin workshop-ah hian Department hrang hrang te Roadmaps presentation leh discussion hi hmasawnna thlentu banpui pawimawh 4 (Catalytic Pillars) : (i) Growth Drivers, (ii) Capital Investment Sector, (iii) Social Development Enablers, and (iv) Anchors of Transformation tih chu common platform-ah hmangin ni lengin technical session hun hmangin, inter-departmental discussions te leh  kum 20247 thleng daih tur priority reforms and flagship initiatives identification te neih a ni bawk.

Vawiin “Transformed Mizoram Vision 2047 Roadmap Workshop”  inaugural  leh technical session 4 a then niin,  inaugural function-ah hian Chief Secretary Pu Khilli Ram Meena, IAS  in “welcome speech leh context setting”  sawina hun a hmangin, Commissioner, P&PID Pu Vanlaldina Fanai “Mizoram Vision 20247” chuan Presentation  a nei bawk. Mizoram Vision @047 video thlirho nghal a ni.

Technical Session tin-ah hian department 6/7 in an department “Vision” theuh entirin, District bawrhsap pakhat zelin “Sharing of Best Practices” presentation a neih bawk. Head of department pakhatin “Interactive Session & Summarization” hun a hmang zel bawk a ni.

Technical session hmanzawh-ah hian Chief Minister chuan hmawrbawkna (concluding remarks)  sawiin, vawiin workshop programme hi a khar ta a ni.