522/2026-2027

Lunglei, 2026 Ṭomir thla ni 14: Rural Development & Administration Department (RD&AD) Minister Prof. Lalnilawma chuan tukin khan Lunglei Circuit House Conference Hall-ah Rashtriya Gram Swaraj Abhiyan (RGSA) hnuai aṭangin Lunglei District chhunga Village Council 22 te hnenah Computer Set leh Printer a hlan.

Prof. Lalnilawma chuan Rural Local Body-te'n sawrkar laipui duhsakna chang a, hmasawnna hna thawhna tur an dawng ṭhin chu a nihlawhthlak hle tih sawiin, fund tang tam tak a zavaia dil chhuah theih a ni chu sawrkar hotute, thawktute leh VC-te thawh hona vang a nih thu a sawi a. VC aṭangin computer set dilna an dawn nual tawh thu sawiin, tuna computer set inhlan chu khawtlang tan ṭangkai taka hmang tur leh uluk taka enkawl turin VC-te a chah a. VC-te'n Own Source Revenue (OSR) atan VC Act thar hmangin property tax leh animal registration tax te an khawn ṭan tawh tih sawiin, he'ng fund te hi khawtlang tana ṭangkai thei ang bera hmang turin a chah a. He'ng OSR an khawn dan azir hian 16th Finance Commission hnuaiah phei chuan Performance Grant te a awm dawn tih sawiin, VC-te chu ṭhahnem ngai leh theih tawp chhuah turin a ngen a. OSR tling khawm aṭanga khawtlang mamawh hna an thawh, fund-in a daih loh a awm chuan sawrkarah thlen tura chahin, a theih anga ṭanpui an inhuam thu a sawi a. VC-te chu sawrkar hnuaia committee pawimawh hrang hrangah hotu chan chang an nih angin dik leh lang tlang taka rorel tur te, party bil sawi lova khawtlang hmasawn nana ṭang ho zel tur te'n a chah.

RGSA hnuaia Computer Set leh Printer semna inkhawm hi Lunglei District Local Administration Officer Pu Beitlotha Nohro chuan a kaihruai a. RD&AD Additional Secretary Pu V. Lalengmawia chuan Minister kaihhruaina hnuaiah thawktute'n Rural Local Body-te hmasawn nan theih tawp an chhuah tih sawiin, 15th FC fund chu State sawrkarin dawng tlai deuh mah se, a hun taka hman zawh theih a ni tur chu lawmawm a tih thu a sawi a. Ni za inhlawhna (VB G RAM G)-ah sawrkar laipuiin thla lak dan thar a ruahman tawh avangin dik leh felfai takin demand siam ṭhin ni se ṭha a tih thu sawiin, computer set an dawn tharte pawh khawtlang tana hna thawh nan ṭangkai taka hmang turin a chah.

Local Administration Department (LAD) Director Dr Lalngura Tlau chuan RGSA chungchang leh LAD hma lakna tlangpui sawi fiahin, RGSA hnuaiah Computer Set sem bakah, VC-te tan capacity building programme te, Panchayat Bhavan sakna leh exposure visit te kalpui ṭhin a nih thu a sawi a. Sawrkarin VC-te tihchangtlun nan theih tawpin hma a la mek tih sawiin, 16th Finance Commission chu rei lo teah VC-te'n an thawk leh thuai dawn a, chumi atan chuan VC tinte'n mahni Own Source Revenue (OSR) tun aia ṭhaa lak luh dan ngaituah a ṭul tih a sawi a. Panchayat Advancement Index (PAI) 2.0 chu tlangzarh mai theih a nih thu sawiin, Mizoram chhunga VC-te PAI 2.0-a an tih ṭhat dan State-wise leh District-wise-a tar lan a nih tur thu a sawi a. Kawrthah North VC te chuan India ram pum puiah Clean and Green Panchayat thematic-ah pakhatna an nih avangin RGSA aṭangin cheng vaibelchhe 1 an dawng tawh tih tar langin, VC dangte paw'n dawng ve thei tura theih tawp chhuah turin a chah.

All Mizoram Village Council Association (AMVCA) Secretary Pu K. Lalzarliana leh ZPM (General Headquarters) Vice President Pu C. Lalnunnema te pawhin thu an sawi a. LAD Joint Director Pu ST Lalhmingmawia'n lawm thu sawiin hun a khar.