521/2026-2027

Aizawl, the 14th of May, 2026: Vawiin chawhma dar 11 khan Pu Lalnghinglova Hmar, Minister of State leh Aizawl West II bialtu MLA ni bawk chuan Dinthar YMA Hall-ah Mizoram Upa Pawl Aizawl West II Area 'B' Lengkhawm Zai Intihsiak programme chu khuallian niin a hmanpui a, Aizawl West II Area 'B' MUP te hnenah hian thilpek Rs. 10,000 a hlan nghal.

Pu Lalnghinglova Hmar chuan, Aizawl West II chhungah lengkhawm zai intihsiak programme buatsaih a ni chu a phurawm a tih thu sawiin, Lengkhawm zai hi a chuai dawn lova, Mizo lunglenna chu Mizo-ah tho tho a ni a. kan rin aiin a tlo dawn a ni, a ti.  Tunhnaiah kan ramah khualzin nasa zawkin an pung telh telh a, heng khualzinte hian an hmuh duh chu kan tlang mawite, kan hmun mawite bakah kan hnam ziarang te, kan inchei dante leh kan chanchinte an hre duh a ni, a ti a. Minister Pu Tetea Hmar chuan tunlai khawvelah changkanna in min luhchilh tawhin hnam changkang zawkte tihdan en ngun thin mah ila, kan kir lehna chu hnamah a ni a, lengkhawm zai hian kan hnamah dinhmun pawimawh tak a luah a ni, tiin a sawi a. Tunlai khawvelah lengkhawm zai intihsiak, a tak taka a hunlai a sa thinte rualin an han ti leh chu lawmawm a ti thu a sawi bawk.

Minister chuan tunlai khawvel thiamna hrang hrang a lo thleng ve ta zel a, kan nun a inthlak danglam ta dawrh mai a. Nimahsela tunlai thiamna hi an kum a upat avanga hlat tum loh tur leh an theih dan chen a inan loh pawhin tum ve tlat tur leh an tel ve chhung chu tar an ni lo mai tur thu MUP member kalkhawmte a chah a. Thildangah pawh tel ve tlat tur leh thangthar awmdan chu zir ve tum tlat tur a chahin, chu chu tar harna a ni thu a sawi bawk.

Mizoram Upa Pawl Aizawl West II Area 'B'-ah hian Dinthar, Dawrpui Vengthar, Tuikual North leh Tuikual South te awmin MUP branch palite hi zaiin an intihsiak a. Aizawl West II Area 'A' te hi April 15, Zirtawpni hian Vaivakawn Kohhran Hall-ah an intihsiak ve thung ang.

MUP Aizawl West II Area 'B' Lengkhawm Zai intihsiaknaah hian Pu Vanlalhruaia, Executive Corporator, AMC, Ward XIII leh Pi Vanlalhruaii, Corporator, AMC Ward - XII te chu Khualzahawm niin an tel ve bawk a ni.