1887/2026-2027

 Vawiin khan RD&AD Minister Prof. Lalnilawma chuan Pradhan Mantri Krishi Sinchayee Yojana-Watershed Development Component 2.0 (PMKSY 2.0) hnuaiah Sesawng leh Thingsulthliah khuaa kuthnathawktute hman tangkai turin bungrua engemawzat a semchhuak a. Hemi pual hian Thingsulthliah BDO Office-ah programme tawi buatsaih a ni.

Prof Lalnilawma chuan hmasawnna hmel a taka hmu tur chuan Department chauh ni lo, khawtlang leh mi mal tin ten inlungrualna leh thawhhona tha kan neih a ngai a ni, a ti a. Mipuiten leirem an rah theih nan sawrkar chuan hmalakna chi hrang hrang a nei tawh thin a, a nei zel dawn bawk, tiin, heng sawrkar hmalakna te hi mipuiten a nih dan tur ang takin, rinawm tak leh tha taka kan chuan hmasawnna hmel thar hi kan hmuh ka beisei tlat a ni, a ti.

Tui hna humhalh kawngah pawh khawtlang inlungrual a tul zia te, theihtawp chhuahtlan a tul thu sawiin, PHE changtu ni bawk Prof Lalnilawma chuan tui pump khawl tha tak neih ringawt a tawk loa, a pump tur tui thianghlim leh tui hna tha kan neih reng a pawimawh a ni, a ti a. Kan thing leh mau te, kan lui dung leh nungcha te hi kan duat a, kan hman tangkai danah neitu rilru kan put thiam a pawimawh hle a ni, a ti bawk.

Pradhan Mantri Krishi Sinchayee Yojana-Watershed Development Component 2.0, Aizawl-2 project hian leilung leh tui humhalh hmanga lo leh huan neitute eizawnna tihhmasawn a tum a. Minister hian Sintex pariat, Electric Sewing Machine pariat, Glycel (case riat), Microwave Oven pakhat, Brush Cutter sawm leh Deep Freezer pakhat a semchhuak a ni.

Pu.Lalnundika MCS, Project Director, DRDO, Aizawl District leh Pi.Malsawmhriatzuali MCS, BDO, Thingsulthliah RD Block te chuan RD&AD Minister hi an tawiawm a ni.