2438/2023-2024

Aizawl, the 23rd October, 2023: Election hun chhung, candidate inhnuhdawh ni leh campaign tawp hun inkara National leh State Recognised Party-ten Sawrkar Media, Doordarshan (DDK) leh Akashvani (AIR) kaltlanga hun an hman dan tur chungchangah vawiin khan Addl. Chief Electoral Officer Pu H.Lianzela hovin ICT Conference Hall, Top Floor-ah ruahmanna siam a ni.

He hun kaihruaitu Addl. Chief Electoral Officer Pu H.Lianzela chuan Sawrkar ruahmannain National leh State Recognised Party-te tan inthlan hun chhunga Sawrkar Media DDK leh Akashvani kaltlanga party thu leh hla, ECI inkaihhruainate zawm chunga chhuah tura hmalak a nih thu sawiin, DDK, Akashvani, State Media Cell leh Recognised Political Party aiawhte kim taka an kal chu lawmawm a tih thu a sawi bawk.

Electronic Media kaltlanga Political Advertisement pek turten Media Monitoring and Control Committee atanga pre-certification an tih zel a tul thu leh vote thlak zawhfel hun bituk darkar atanga chhiar leta darkar 48 chhung 'silent period' ah campaign kaihhnawih tihchhuah phal loh a nih thu a sawi a. Kalkhawmte chu vote tla a that theih nan mipuite zirtirna tam zawk pe turin a chah a. Kum 80 chin leh Vohbik 40% disability neite zinga in lama vote thlak (home voting) duh an awm a, an dil bawk chuan ruahmansak an ni dawn a, hmun danga lehkha zirte'n vote thlak an ngaih pawimawh theih nan leh India rama vote tlak thatna ber ni tura tan lak tlan a pawimawh thu a sawi a. Vote thlak ni November ni 7, 2023 chu sawrkar hnathawkte bakah mimal sumdawng emaw, hnuaia thawk neite tan hlawh kiam chuang lova chawlh, ‘Paid Holiday’ ah Sawrkarin a puan thu tarlangin, hei hian mimalin hnathawka an chhawr/awmpuite pawh huam vekin vote thlak tura an haw laia hlawh pawh pek ngei ngei tur a ni tih a sawi bawk.

Vawiin hun hmanah hian Pi Lalnunziri, Head of Programme, Akashvani, Aizawl leh Pu C.Vanlalsiama, Head of Programme, DDK Aizawl-ten ruahmanna neihte an sawifiah a; hemi hnu hian Recognised political party-te hun chan dan tur pawh niin ruahmanna felfai tak siam a ni a. Recognised Political Party tin tan tum khatah minute 15 aia sei lo zela tih chhuah tura ruahman niin, chhuah zat tur erawh inthlan hmasa lama an chet that dan a zir zelin bituk a ni.

He hunah hian Recognised political party-te chu Sawrkar laipuiin a ngaih pawimawh leh a thlawn liau liaua ruahmanna a siam chu ngai pawimawh tur leh a tihlawhtlingtu nih tum tura chah an ni a. DDK leh Akashvani kaltlanga an thu leh hla tih chhuah turah ram dang rorelna sawiselna, hnam, chibil leh sakhua anga inhuatna chawk chhuak thei thil te, hming hmerha mi dang beihna leh tawngkam mawi lo hman te, tharum thawhna lam hawi leh Court thutlukna kalh zawngte dah lo tur te, President, Judiciary leh ramhimna chungchang hmer tel lo turte leh ram inpumkhatna tichhe thei zawng tihlan a rem loh thu hrilh an ni.

An thu leh hla record turte chu tih chhuah a nih hmain uluk taka endik phawt a nih dawn thu tarlan niin, ECI in a pek chhuah digital time voucher keng zel tura chah an ni a. Recognised party-te thu leh hla hi DDK ah chuan October ni 27, 2023 zan atanga November ni 4, 2023 thleng pek chhuah tur a ni a, zan dar 7 atang zelin chhuah thin a ni ang. Akashvani/AIR ah chuan October ni 26, 2023 atanga pek chhuah tur a ni a, zing dar 7 atanga zan dar 8 inkarah a chhuak thin ang. Radio Station, Tuikhuahtlang-ah October ni 25, 2023 chawhma dar 10 atangin recording tan tur a ni ang.

He hunah Deputy CEO Pu Henry C. Lalrawnkima leh Election Offical dangte, DDK leh Akashvani thawktute, Recognised National Party BJP, INC leh AAP te bakah Recognised State Party MNF leh ZNP aiawhte an tel a ni.