Vawiin khan Regional Cancer Centre building thar chu Zemabawk-ah Chief Minister Pu Lal Thanhawla'n a hawng. Regional Cancer Centre hi kum 2003 atang khan Aizawl Civil Hospital-ah peng pakhat anga din tan a lo ni tawh a, Zemabawk-ah Cancer natna veite enkawlna hmun bik turin vawiina hawn tak Regional Cancer Centre hi sak a ni.

Chief Minister chuan thusawiin Mizoram chu cancer tamna ber ram a ni chu a zahthlakin a vanduaithlak hle a, sorkar pawhin mipuite hriselna chu a ngaih pawimawh berte zing ami a ni, a ti. Mizoten cancer an vei nasat chhan zirchian a tul hle a, amaherawhchu cancer natna thlentu chiang taka mithiam ten an sawi vaihlo leh ei leh in lama insumtheihna kan nei a, inzirtir tam a ngai hle bawk, a ti. Cancer natna enkawlna tur state pawnah refer an ni thin chuan state sum pawh a ei hek hle a ni tiin Chief Minister chuan tualchhung ngeia damlo te enkawl theihna tur hmun changtlung tak sorkarin buatsaih zel a tum thu a sawi bawk. Sorkar laipuiin National Rural Health Mission hnuaiah Mizoram tan hriselna lama hmasawnna tur sum leh pai tam tham tak a pek tawh ngaihtuahin hmasawnna hmuh tur a la tlem hle a, chuvangin tanlak leh zual angaih thu leh doctor leh nurse te pawhin an hnathawh chu missionary rawngbawlna anga ngaiin mipuite tan inpekna thuk tak leh taima taka thawk turin a fuih a ni. Mizoram chu India ramah state entawntlak ber a nih theih a rin thu leh chutiang dinhmun a thlen hun chu a nghahhlelh awm a tih thu sawiin Pu Lal Thanhawla chuan kan ram leh hnam tan thawk kan ni tih hre reng chungin mi zawng zawng mahni hmun theuhah rinawm tak leh thahnemngai takin i thawk ang u, a ti. Mizoramah Regional Cancer Centre tha tak din theih a nih theih nana hmalatu leh thawktu zawng zawngte chungah lawmthu sawiin duhsakna a hlan a ni.

Health Minister Pu Lalrinliana Sailo pawhin thusawiin Mizoram chhungah ngei Regional Cancer Centre din a nih tak chu lawmawm a tih thu a sawi a, he Centre hi changtlung taka siamchho turin chak taka hmalak a nih tur thu a sawilang bawk. Khawvel inher danglam zelah mipui khawsak leh nunphungte pawh a danmglam zel a, Mizo zinga natna hriat ngai vak loh thisen sang te, zun thlum te leh lung lam natna te a pun chho zel thu a tarlang a. Ni khatah Aizawl Civil Hospital-a damlo enkawlna senso chu cheng nuai 4.4 hu vel, thla khatah cheng nuai 13.6 vel leh kum khatah cheng vaibelchhe 16 hu vel a nih thu a tarlang bawk. Regional Cancer Centre tanpui nan BSNL ten cheng nuai 2.5 a pek chungah lawmthu a sawi bawk.

RCC hawnna hunah hian Chief Minister leh Health Minister bakah Parliamentary Secretaries Pu S. Laldingliana leh Pu K.S.Thanga, Law Commission Chairman Pu R.Lalrinawma, MLA Col. Z.S.Zuala leh Chief Minister nupui Pi Lal Riliani, President, Indian Society on Tobacco & Health (Mizoram Chapter) te an rawn tel bawk. Khuallian leh mi pawimawh dangte hi RCC pindan tin fanpui niin hmanrua awmte entir an ni.

Hospital & Medical Education Director Dr. D.Baruah chuan Regional Cancer Centre bultan dan leh cancer enkawlna lama department hmalakna leh hlawhtlinna hrang hrang a tarlang a. Dr Lalrinliana Sailo, Jt. Director, H&ME in inkhawm kharna lawmthu a sawi bawk.

Attachment

  • Loading attachment...