Industries Minister Pu H. Rohluna leh Parliamentary Secretary Pu Joseph Lalhimpuia chu February ni 26, 2016 khan Dimapur, Nagaland-a Ministry of Micro Small and Medium Enterprises buatsaih, Regional Conclave of MSMEs for North Eastern Region-ah Mizoram sawrkar aiawhin an tel a. Conclave hi Union Minister for MSME, Pu Kalraj Mishra’n a hmanpui a ni.

Industries Minister Pu Rohluna chuan Mizoram thusawiin Mizoram hmalakna leh harsatna hrang hrangte a tarlang a. Minister chuan Aizawla MSME Development Institute Branch Office, Agartala atanga enkawl mek chu mahni inrelbawl hrang thei tura upgrade turin Union Minsiter hi a ngen bawk.

Union Minister for MSME, Pu Kalraj Mishra chuan Mizoram harsatna hrang hrangte chu lo enzui a tum thu Minister hi hrilh nghal in Bank then khat, sawrkar hmalakna tawiawm thalote chu chhui zui nghal a nih tur thu a sawi a. Union Minister chuan Baktawnga Alluminium Processing Cluster dinna tura proposal kal mek pawh tihpuitlin thuai a nih tur thu a sawi bawk.

Regional Conclave of MSMEs for North Eastern Region hi MSME Ministry hnuaia hmalakna hrang hrangte hlawhtlinna leh harsatnate zirchian nana buatsaih a ni a. He Conclave-ah hian PMEGP kaltlanga sawrkar laipui hmalakna zara thalai tam takin Mizoramah pawh eizawnna an neih thawh thu tarlan a ni.