Election Commission of India chuan Electoral Roll felfai zawk neih a nih theih nan beihpui, ‘National Electoral Rolls Purification (NERP) 2016’ a buatsaih dawn a. Hemi chungchangah hian mipuite hriat atan a hnuaia mi ang hian thuchhuah a siam.
Election Commission of India chuan Electoral Roll felfai zawk nei tura beihpui thlakna "National Electoral Rolls Purification (NERP) 2016" chu March 1, 2016 atanga neih tan turin a duang a, August 31, 2016 thleng a awh ang.
He NERP in a tum ber chu January thla a Electoral Roll tarchhuah takah khan felhlel a awm em tih leh kum tling chin vote nei thei turte an chuang kim em tih enfiah a ni a.
He beihpui thlakna neih chhung hian hetiang hian hmalak tum a ni - Electoral Roll-ah vote nei thei kum tling chin, a bikin kum tling thar kum 18-19 ni mek ho chuan kim tirte, hmun khat aia tama Electoral Roll-a chuangte an awmna hmun pangai nilo zawk a an chuanna atanga paihte, mithi tawhte electoral roll atanga an hming paihte, EPIC diklo siamthatte, Electoral Roll a thlalak fiah lo thlakte, Electoral Roll-a particulars (hming/pa hming/kum etc.) diklo awmte siamthatte leh Polling Station dinhmun enfiahte a ni a. NERP 2016 ah hian NGO-te nen tang hova hmalak tum a ni a, Political Party aiawhte nen pawh NERP chungchangah hian meeting la neih tur a ni. NERP 2016 neih chhunga BLO-te tawiawm turin Political Party tinte chu Polling Station-tin atan BLA ruat turin beisei an ni.
He beihpui thlaknaah hian Polling Station tin Electoral Roll chu a mal te te in chhiarpui (Census, 2011) a mihring awm zat nen khaikhin a ni ang a, he khaikhinna atang hian vote nei thei chin electoral roll-ah thun kim an ni em tihte, Chhiarpui nen khaikhinin Electoral Roll-ah mipa leh hmeichhe zat inthlauhna a danglam viau em tihte leh Electoral Roll hlui nen khaikhinin Electoral Roll thara elector chuang zat chungchangah fel hlel a awm em tihte zir chian a, a tul anga hmalak dan tur duana, hmalak zel tur a ni. NERP 2016 kalpui dan tur chungchang hi District tin aiawhte nen sawiho a ni tawhin March 1, 2016 hian District tinah NERP 2016 hmalakna hi tan nghal a ni ang.”
