Vawiin chawhnu dar 1 khan Government Serchhip College-ah National Science Day lawmna hun hman a ni.

He hun hi Smart Class Room-ah hman niin, Pu N.B. Sachhei, Associate Professor, HOD, Department of Zoology chuan kaihruaiin, Pu Lalhmangaiha Sailo, Principal, Govt. Serchhip College chuan inlawmna thu a sawi a, National Science Day hi ni 28 February a hman thin a ni a, kuminah erawh chuan Pathianni anih avangin vawiinah hian hman anih thu a sawiin Sir C.V Raman chanchin tlangpui a sawi bawk a ni.

Resource Person Pu Laldingluaia Khiangte, Asst. Professor, Dept. of Chemistry chuan thusawiin, National Science Day hi India Scientist ropui Sir C.V. Raman’an Raman Effect a hmuhchhuah ni a ni a, he ni hi kum 1986 atang khan kum tin lawm thin niin, kum 2009 atang khan thupui neia lawm thin a nih thu a sawi a. He ni ah hian India rama Science hmasawnna leh Science leh Technology nihphung mipuite hnena inhriattirna atan hman thin a nih thu a sawi. Kuminah hian India Prime Minister in a ngaihpawimawh em em “Make in India: Science & Technology driven Innovation” tih chu thupui atan hman niin, Science leh Technology thiamna hmang thil thar a tam thei ang ber siam chhuak tura inzirtirna atan hman a ni a ti a, Resource Person hian Power point hmangin kalkhawmte chu zirtirna a pe a ni.

Govt Serchhip College-ah hian Science zirna hi Department 5 awmin, thawktu mi 19 an awm a, zirlai naupang mi 80 an awm mek a, National Science Day hmanna ah hian zirlai naupang an kal tha hle a.Dr. C. Vanlalnghaka, Associate Professor chu he ni atan hian coordinator niin, a ni hian lawmthu sawiin he hun hman hi khar a ni.