Chief Minister Pu Lal Thanhawla chuan vawiin khan Anti Corruption Bureau (ACB) office, New Secreatariat Complex, Khatla a an conference hallah ni thum chhung awh tur Training on ‘Anti Corruption Laws & Investigation of Cases’ chu a hawng.

Chief Minister chuan kuttlinglova sum lak luh, corruption, eirukna hi kum 2008 inthlan dawna mipuite hnenah a zung chawpa phawia phoro anih tur thu an sawi thu leh chumi atana ACB chu Director, IPS Officer enkawlna hnuaiah Directorate a hlankai anih tur thu an lo sawi tawh thin a ni a ti a. Corruption hian khawtlang a tichhia a, sorkar a timualpho a, mipuiin an tuar nasa a ni a ti a. Chuvangin democracy ah chuan corruption hi ram leh hnam hmelma a ni a ti.

Chief Minister chuan hmasawnna tura project lian tak tak hmachhawpte hi kuttlinglova sum lak duhna avangin a hun takah a zawh theih loh phah mai piahlamah, thawhzawh anih pawhin a hna a chhe thin hle a, hei hi mihnuaihnung zawkten tuarin, an chanvo tur a ti hek nasa thin a ni a ti a. Chuvangin mirethei zawkte hian eirukna avangin heng hmasawnna tur project tha tak takte hian an hnen a thlen phak an ring ngam thinlo a ni a ti. Hemi tireh tur hian kan zavaia kan tan tlan angai a ni a ti.

Chief Minister chuan anti corruption officerte chu training an neih tur hian an thiamna leh an remhriatnate tuaihriama ti chakin, an hna theuhte chu felfai tak leh tlin taka zirchhuaka, thil tisualtu an hmuhchhuahte chu hrem an nih ngeina turin thleibik neilo leh huaisen taka thawk turin a chah a ni.

Chief Minister chuan ACB officerte leh Mizoram Police te tana Aizawlah ngei Central Bureau of Investigation (CBI) Instructor pathum, CBI Academy, Ghaziabad atanga traininig pe tura Chief Secretary leh Director ACB te hmalakna chu fakawm tiin, lawmthu a sawi a, CBI Instructor lokal te hnenah pawh lawmthu a sawi bawk a ni. Hetiang training ACB in alo kalpui tawhah training la tuten an hlawkpui hle tih Chief Secretary leh Director ACB ten an sawi chu thil lawmawm tak a ni tiin, training nei tur zawng zawngte chu duhsakna a hlan a ni.

Hawnna inkhawm hi Pu Ajay Keshyap, IPS, Director, ACB in kalkhawmte lawmna thu sawiin, Chief Ministerin sorkar tha leh felfai, langtlang leh mipui nel ngam siam a duhna chu ropui a tih thu a sawi a. Tum tum training hi tum 4 na niin, Training neih turah kawng tam tak, technical lam thlenga zirtirna pek anih tur thu a sawi a. Tun tumah hian mi 40 vel hnenah training pek a ni ang a ti.

Chief Minister hi Lt Col (Rtd) Z.S Zuala, Parliamentary Secretary in a tawiawm a ni.