Mizoram State Rural Livelihood Mission (MzSRLM) leh District Rural Development Agency (DRDA) Champhai te tangkawp  buatsaih Regional Saras Fair 2019, October Ni 28 atanga November Ni 8, 2019 chhunga neih chu zirtawpni (8.11.2019) khan VANISH Hall-ah khar a ni.  Kharna hun hi Champhai SP  Pu Rex Zarzoliana Vanchhawng chuan khuallian niin a hmanpui a ni.

Khuallian chuan Champhaia SARAS Fair hlawhtling taka buatsaih a ni chu lawmawm a tih thu sawiin, SHG te siam chhuah hmun hla tak pan ngai lova  khawtuala  lei theiha chhawp chhuah a ni chu lawmawm a ti a. Self Help Group kalkhawmte chu an thil siam chhuah leh an thar chhuahte eizawnna tak tak atana an hman theihna turin ram danga thawn chhuah tham siam chhuak tur leh thar chhuak tura theihtawp chhuah turin a chah a. Mahni eizawnna hrechianga ngai pawimawh tura chahin,  khawtlang leh pawl hrang hranga inhman aia eizawnna dah pawimawh hmasa a,   taksa hriselna khawih pawi thei zuk leh hmuam laka insum turin a chah bawk a ni.

He hunah hian Pi Ethel Rothangpuii PD, DRDA Champhai pawhin thusawiin,  Regional Saras Fair chu Self Help Group hrang hrangte thawhrimna avanga hlawhtling a nih thu sawiin an inpeknaah lawmthu a sawi a.  SHG hrang hrangte chu an mahni khua theuha an haw hnuah pawh rim taka hna thawk chhunzawm a, eizawnna ngelnghet zawk an neih theihna tura tan la chhunzawm zel turin a chah bawk.

Regional Sarah Fair Champhai 2019 neih chhunga Dawr tha ber atan Vaphai VO, Khawbung RD Block thlan a ni a.  Block tha ber atan Chawngte RD Block thlan niin, Saras Queen atan Pi Lalrampari, Serchhip RD Block chu thlan a ni bawk. Regional Saras Fair-ah hian Block hrang hrang 14 atangin SGH member 100 te kalkhawmin dawr man tlawm zawkin thingtlang mite thar chhuah leh siam chhuahte zawrhna Stall 50 siam a ni a. Fair hun chhung zawng hian Skill development lama inzirtirna Deendayal Upadhyaa Grameen Kaishalya Yogana (DDUGKY) Stall siam hmanga neih thin a ni. A kharna tiam lohin nimin November Ni 7, 2019  thleng khan Cheng 21,54,331 man hralh chhuah tawh niin, mi 7759 ten an tlawh tawh  a ni.

SARAS Fair hi Mizoram State Rural Livelihoods Mission (MzSRLM) hmalaknain an enkawl Self Help Group te tan tum 4 buatsaih tawh a ni a, tun tum hi a vawi 5-na niin a vawi 6-na atan December thla hian Aizawlah neih a ni leh dawn a ni. SARAS Fair hian thingtlang a cheng te thil siam leh tharchuah te zawrhna leh hralhna tur hmun tha siam sak a ni a, man man zawk leh thianghlim zawkin thil tharte phochhuaha hralh thin a ni a, a hlawkna pawh thingtlang mite kutah a lut vek thin a ni.

He hun hi Pi H.Lalchhandami, CEO MzSRLM in lawmthu sawia kharin, thingtlang mite thlai thar leh thilsiamte hlutthiama Regional SARAS Fair hlawhtling tak nei thei tura thathawhtu leh dawrtute chungah lawmthu a sawi a ni.