Regional Seminar on Investment Education chu ni 8.7.2015 (Nilaini) 2:30 pm khan Aijal Club-ah Bombay Stock Exchange (BSE) leh Securities Exchange Board of India (SEBI) ten an huaihawt a. He seminar hi Pu Thanglura, President, Mizoram Consumers’ Union in a kaihruai a ni. Thusawi tura ruatsa A. Sunil Kumar (Regional Director, SEBI), Purushottam Saraf (Regional Head, BSE) leh Moloy Biswas (Regional Head, Central DepositoryServices Ltd) te an thlawhna a rawn tum thei lo chungin Prashant Kumar Jha, Deputy Manager, BSE Kolkatta Branch leh Vanlalthlana, Asst Professor, Pachhunga University College hnen atangin sum peipunna chungchanga kan hriat tur awm atana pawimawhte ngaihtlak a ni.
Pu Vanlalthlana hian a zirna neih atangin Mizoten sum peipunna lama thumal hriat ngai kan hriat tlem zia te, sum khawl leh peipunna lama kan fate kan zirtir tlem zia te, pawisa khawlna lamah India rama cheng dangte kan phak loh zia te, fixed deposits leh insurance kan hriat viau laia equity shares leh mutual fund kan hriat loh thu te, sum punna sang leh ‘risk’ sang a inkungkaih tlat thu kan hriat tawk loh thu te leh sum peipunna lem zawn chhuah leh hrem chungchangah hei aia nasa zawka sorkar lamin hma a lak a ngaih thu a sawi a ni.
Prashant Jha hian sum peipun theihna chi hrang hrang a tar lang a. Mutual Fund leh Equity Shares lam sawi zau bikin, heng sum peipunna hmanruate hi a pung a san bik bakah pawisa chantheihna a sang bik tih a sawi a. Company siam ve thei lo leh sum tak tak senga sumdawnna tan thei lo tan, sumdawnna/company kum rei tak lo awm tawh neitute zingah pawisa tlem te hmanga a tel theihna hmanrua a nih thu leh share/mutual fund lei tura tl tih ngai te chu kalkhawmte a hriattir a. Tin, SEBI-in mutual fund leh equity share kaihhnawiha sum peipung tura pawisa dahtuten harsatna an tawh huna ‘complaint’ thehluhna tur leh hma lak dan tur te power point presentation hmangin a sawifiah a ni.
Thusawi ngaihthlak a nih zawh hian zawhna leh chhanna hun hman a ni a. Hemi hunah hian sub-broker nih theih dan tur te, Aizawl chhunga investment tih theihna tur te leh hriat belh ngai hrang hrangte sawi ho a ni.
Seminar ah hian sumdawng pawl hrang hrang aiawh te, tlawmngai pawl aiawh te, College hrang hranga Commerce zirlaite leh an zirtirtu te, sumdawnna lama buaina chingfeltu tur a ruat te, Police hotute bakah department thenkhat aiawhte an tel a ni.
