Nimin (20.2.2019) khan Tourism Minister Pu Robert Romawia Royte chuan Reiek Tlang leh a chhehvela Tourism Department hmalak mekte leh hmalak zelna tur hmunte a tlawh a. Pu Lalnunmawia Chuaungo IAS,Chief Secretary leh Official dangten an tawiawm a ni.

Minister chuan Tourism Department-in  "Zo khua" a Zo In a sak mekte, Zipline 2 a siam mekte leh Adventure Sports tihna tur hmunhma a siamte chu tlawhin Contractor-te chu hna tha taka thawk tur leh Zo Khua chu fur ruah tlak hma ngeia sa zo turin a ngen.Tourism Minister chuan Reiek kham leh a tlang awm dan chu khawvel hmun danga awmte hmuh chak tur chi a ni tih sawiin  "Reiek Tlang hi Tourist te hipna hmunpuiah siam kan tum," a ti a.  "Reiek kham ko sang tak atanga filawr chhuaka kea kalna siam a nih chuan khawvel huap pawha lar leh tlawhtu nghah Kuala Lumpur Tower aiin a sang dawn a ni” a ti.

Minister tawiawmtu Pu Lalnunmawia Chuaungo IAS,Chief Secretary pawhin Reiek khua chu mi tam takin an tlawh thin tawh thu sawiin ruahmanna mumal tak siama hmalak a tul thu a sawi.

Tourism Minister in Reiek tlang a fannaah hian Chief Secretary leh Tourism Department hotute bakah Reiek Village Council Member-ten an tawiawm a, Minister hi Reiek MUP te, Reiek Branch YMA leh Reiek MHIP ten lo lawmin kawmna hun an hmang nghal bawk a ni.