Kumina Village Council (VC) inthlan neih tura hman tur, Lawngtlai District-a Lai Autonomous District Council (LADC) leh Chakma Autonomous District Council (CADC)-a Final Electoral Roll chu nimin piah khan Lawngtlai District Election Officer, Lawngtlai Bawrhsap ni bawk Pi Shashanka Ala, IAS chuan Lawngtlai DC Conference Hall-ah a tlangzarh a. Political party ai awhte hnenah a bu a sem nghal bawk.

Ruahman lawk dan chuan kumin March thla hian LADC huam chhunga village council awm zawng zawng 95-ah general election (inthlanpui) buatsaih niin, CADC huam chhunga village council 6-ah by-election buatsaih a ni dawn a. LADC huam chhungah hian polling station 95 awmin, station tinah polling booth pakhat ?heuh a awm a. Final roll-a a lan danin, he'ng polling station 95-ahte hian voter mipa 24105 leh hmeichhia 25020, an zavaiin voter 49125 an awm a. Draft roll tlangzarh hnua thun belh 5451 leh paih 2106 awmin, draft roll aia a punna hi voter 3345 a ni.

CADC hnuaia by-election neihna tur village council paruk (6)-ah chuan voter mipa 2943 leh hmeichhia 2305, an zavaiin 4648 an awm a. Draft roll-a thun belh 312 leh paih 5 awmin, draft roll a?anga a punna hi voter 307 a ni.

Lawngtlai District Election Officer Pi Shashanka Ala chuan village council inthlan hun atan March ni 12 ruahman chhin a nih thu leh February ni 22 hian State Election Commission (SEC) a?angin tihchian a nih dawn thu a sawi a. Political party leh tlawmngai pawl ai awhte chu inthlan felfai leh thianghlim tak a awm theih nan theih tawp chhuaha hma lakpui atan a sawm bawk.