Vawiin khan National Programme for Control of Blindness & Visual Impairment (NPCB&VI), Lawngtlai District leh Eye Care Community & Research Centre, Aizawl te tang kawp huaihawtin ni hnih awh tur, a thlawna mit entirna "Eye Camp" chu CMO Conference Hall, Lawngtlaiah buatsaih a ni.

Hemi atan hian Aizawl atangin Senior Eye Specialist Dr KL Remsanga leh a team-te an lo kal a. Vawiina Eye Camp hawnna hun tawi buatsaihah Dr KL Remsanga chuan mit tha lo leh damdawia enkawlna mamawhte tana Lawngtlai District Health Department-in Eye Camp an buatsaih thei chu lawmawm a tih thu leh Lawngtlai mipuite'n an hlawkpui ngei a beisei thu a sawi a. District mipuite tana malsawmna nih chhunzawm zel turin Lawngtlai District Health Department hnuaia thawkte chu a chah zui nghal.

Vawiina Eye Camp hawnna hun tawi hi Senior Medical Officer Dr S. Thaizi chuan a kaihruai a. Lawngtlai District Hospital-a Medical Officer Dr Zothanpari Chhakchhuak pawhin thu sawiin, tun hnaia India ram damdawi in fai inelna Kayakalp-a Mizorama damdawi in fai ber leh mawi ber lawmman an lak thu leh heti ang lawmman an lak theih chhan chu mipuite thawhpuina vang a nih thu a sawi a. Damdawi in vawn fai chungchangah mahni ta anga en a, thahnem ngai taka pui zel turin mipuite a ngen bawk.

Eye Care Community & Research Centre, Aizawl atangin mi 8-in Dr KL Remsanga hi an rawn tawiawm a. Vawiin kha inentir ni atana ruahman niin, mi 350 bawr velin hming an ziak a. Naktuk hian mit naute paw (cataract) zai ngaite a thlawnin an zai nghal dawn a ni.