Vawiin khan Lawngtlai DC Conference Hall-ah District Election Officer Pi Shashanka Ala, IAS hovin kumin March thlaa LADC leh CADC huam chhunga village council inthlan buatsaih tura inpuahchahna tur leh thil tul hrang hrang sawi ho a ni.

DEO Pi Shashanka Ala chuan village council-te chu mipui nena inhnaih ber leh hma sawnna hna hrang hrang a taka thawktu ber an nih avangin an pawimawh em em a, inthlan pawh fimkhur taka kalpui a tul a ni, a ti a. VC inthlan boruaka mipui an chen theih nan inthlan chungchang zau taka puanzar leh mipui zirtir a pawimawh tiin, hlawhtling leh felfai taka inthlan buatsaih a nih theih nan line department hrang hrangte thawhpuina a ngen nghal a ni.

He hunah hian inthlan felfai leh muanawm tak a awm theihna tura venhimna leh dan lek kawh dan tur chungchang te, mipuia thu pawimawh puanzar dan tur te, polling booth tina eng leh tui pek dan tur te, inkal pawhna leh inbiak pawhna chungchang te, sector officer leh mawh phurtu pawimawh dang inruat chungchang te sawi ho a ni a. VC inthlan chu March ni 12-a neih a nih a rinawm thu te, February ni 22 hian State Election Commission (SEC) lamin inthlan an puan beisei a nih thu te leh inthlan puan atang chuan inthlan boruakah chen vek a ngaih tawh tur thu te sawi lan a ni bawk.

Tun tumah hian Lai Autonomous District Council (LADC) huam chhunga village council awm zawng zawng 95-ah leh Chakma Autonomous District Council (CADC) huam chhunga village council 6-ah te inthlan hi buatsaih a ni dawn a ni.