Lok Sabha Inthlanpui 2019 lo awm tur atan March ni 2 leh ni 3-ah te hian Lawngtlai District huam chhunga polling station tinah vote nei thei, electoral roll-a la chuang si lote roll-a thun nan special camp buatsaih a ni dawn tih Lawngtlai District Election Officer Pi Shashanka Ala, IAS chuan a sawi.

Election Commission of India (ECI) ruahmanna angin he camp hi buatsaih tur a ni a. February ni 22, 2019 (zirtawpni) hian he inthlanpuia hman tur final electoral roll chu tlangzarh a ni dawn a. He final roll hi political party tin leh Booth Level Officer (BLO)-te hnenah pek chhuah niin, final roll-a chuang lote thun belh nan special camp hi polling station tinah buatsaih a ni dawn a ni.

Special camp buatsaih ni, March ni 2 (Inrinni) leh ni 3 (Pathianni)-ah te hian BLO-te chu an vil polling station-ah awm vek tura tih an ni a. Final electoral roll bu khat chu a duh apiangin an en atan chhawp tur a ni a, ziak leh chhiar thiam lote tan roll-a hming chuangte hi a puana puan bawk tur a ni. BLO-te chuan an mamawh tawk Form 6, 7, 8 leh 8A te an inchhawp ang a, vote nei thei roll-a chuang si lote chuan he'ng form hmang hian roll-a luh an dil thei ang.

Elector's Photo Identity Card (EPIC) neih ringawt hi vote thlak thei tihna a ni lo va; electoral roll-a chuang lo chuan EPIC nei mah se, vote an thlak thei dawn lo a ni. Chu vang chuan, EPIC neite paw'n roll-a an hming a chuan leh chuan loh an enfiah vek tho a pawimawh a; an hming a lo chuang lo a nih chuan Form 6 hmangin camp-ah hian roll-a thun an dil thei ang.

Special camp-a form lutte chu BLO-in a tih tur ang ang ti fel nghalin, Electoral Registration Officer (ERO) hnenah a theh lut ang a. ERO chuan March ni 14, 2019 ral hmain chingfel hman vek tura tih a ni.