Govt.J.Thankima College chuan Management – Tech Meet, Vartian ’19 chu vawiin khan an College campus Bawngkawn Brigade-ah an buatsaih a, he hunah hian School Education Minister Pu Lalchhandama Ralte chu khuallian a ni.

Minister chuan tunlai khawvel kalphung thlirin thalaiten mahni kea dinga eizawnna kawng zawh a tul tawh a, chutiang atan chuan  zirlai ten  Management-tech meet  chu chhawr tangkai  se a duh thu a sawi. Pu Lalchhandama Ralte chuan management chu eng field-ah pawh thil pawimawh a nih avangin zirlaite tana management lama thiamna neih hi a hlu a ni, a ti a. Thalaiten zirna kawngah degree sang tak tak nei mah se, hna hmuh a lo har ta a, mahni kut kea din theihna tur Management zirna J.Thankima College-in a hawng chu lawmawm a tih thu a sawi. J.Thankima College-a Management zirna atangin thalaiten kawng dik an zawh thei dawn a, zirlaiten tumruhna an neih a, fing taka ngaihtuahna an hman a hun tawh, Education Minister chuan a ti a. He Management Tech-Meet hian thalaite rilruah inthlakthlengna tha hring chhuak ngei se a duh thu a sawi bawk.

Prof. C.Lalremruata Principal J.Thankima College  chuan an college chu Government College zingah Management zirna hawng hmasa ber an nih thu a sawi a. College zawng zawngah Arts subject lama tlan hum hum hi a fuh tawh lova, management lama kal hi a tul tawh tiin J.Thankima college chuan Management chu sum lamah mahnia intum chawpin a kalpui rih dawn tih a sawi bawk a ni.

Govt.J.Thankima College-in Management –Tech Meet Vartian ’19 a buatsaih hian ni hnih a awh dawn a.  Technical session vawi 4 neih turah  mi thiam te leh  sumdawnna kawnga mi hlawhtling tak tak ten presentation an nei ang a, inkawmna leh sawihona hun te pawh a awm dawn a, sumdawngten an thil zawrh leh siamte an pho chhuak bawk a ni. Management-Tech Meet hawnna hunah hian J.Thankima College thawktute, zirlaite leh mi pawimawh dang thahnem tak an tel.