Vawiin chawhma khan Mizoram State Council for Child Welfare(MSCCW) member te chu Raj Bhavan-ah lenglutin Governor Kummanam Rajasekharan an kawm a. He hunah hian MSCCW  puipate chuan an Danbu chhunga inziak angin Governor chu an Patron-in -Chief atan an sawm a. Governor chuan MSCCW member te sawmna chu a pawm nghal a ni.

Pu JC Japanruna, Working President, MSCCW , Prof H. Lianzela leh member dangte hnen atangin MSCCW hmalakna hrang hrang te, naupangte hamthatna tura din a nih thu te bakah Central leh State sawrkar te nen an thawhonate ngaihthlak hmasak a ni a. Hemi hnu hian Governor Kummanam Rajasekharan  chuan a hriatbelh duhte leh MSCCW hmachhawp te a zawt a. Hun remchang hmasa berah Nu leh pate pualin naupang enkawl uluk a tul chungchangah Seminar buatsaih turin MSCCW  chu a ngen nghal a ni.

Governor chuan State atanga tanpuina sum dawn a harsa a nih pawhin Central Sawrkar hmalakna hnuaiah Naupangte hamthatna tur Scheme tamtak a awm thu a sawi a. Central Sawrkarin Budget puitling a pharh hnuah heng scheme te hi MSCCW bakah Naupang tana hnathawktu tlawmngai pawl hrang hrangte pawhin haichhuah an tum a ngai a ni a ti. "Naupang te enkawl that hi thil pawimawh tak a ni a. Naupang baihvai leh enkawltu neilo an pun chhan pakhat chu Nu leh paten an fate laka an mawhphurhna te an hriat thin loh vang a ni pakhat a. Nu leh pa te, naupang enkawlna tha pek kawngah zirtir kan la ngai nasa hle a. Naupangte uluk taka enkawl hi kan hmalam hun ngaihtuahawm lova kan  siamna a ni", a ti.

MSCCW hi sawrkarin Juvenile Justice (Care and Protection of children) Act 2000 leh  Mizoram Juvenile Justice (Care and protection) Rules, 2003 anga Naupang te enkawlna leh venhimna kawnga hmalakna endik tura  din, scrutinizing agency a ni a. MUP General Hqtrs chungah Office neiin Naupangte tan Campaign hrang hrang te school-ah te an neih thin bakah naupang enkawlna hmun te endik thin in naupang te puala programme te pawh an buatsaih thin a ni. 

Attachment

  • Loading attachment...