Special Summary of Electoral Roll 2019 hmanga Electoral Roll siam thar ber Final Electoral Roll chu vawiin khan Champhai DC Conference Hall, Keifangtlangah tlangzarh a ni a. He hun hi Champhai District Electoral Roll Observer Pu Biaktluanga IAS, Commissioner & Secretary to Government of Mizoram H&TE, GAD chuan a rawn hmanpui a. Champhai District Election Officer Dr. Naveen Aggarwal chuan Party aiawh tinte hnenah Final Electoral Roll  copy khat theuh a Bu leh CD-in a hlan nghal a ni.

Pu Biaktluanga chuan Election Commission of India duhdanin Champhai District Electoral Roll siamthatte chu Observer-te enpuina hnuaiah kalpui a ni a, endikin Champhai tum thum a lokal thu a sawi a. Roll a lut tur dik tak leh paih ngaite paih an nih theihna turin Sawrkar leh khawtlangte tangruala tha taka thawhho angaih thu a sawi.

Pu Abraham Beirazi Khithie, Election Officer Champhaiin Electoral Roll siamthat anih hun chhunga ECI duhdana hmalakna hrang hrang an thawhte  tarlangin, Election kaihnawih thila Party aiawh leh Media lamte tawiawm thinnaah lawm thu a sawi a ni.

Special Summary Revision of Electoral Roll 2019 Final Publication-in a tarlan danin Champhai District-a Assembly Constituency 5-ah Vote nei Mipa 42690 leh Hmeichhia 43688 an awm a. Vote nei zawng zawng hi mi 86378 niin, Mipa aiin Hmeichhe voter 998 in an tam zawk a ni. 22-Tuichang A/C, 23-Champhai North A/C leh 24-Champhai South A/C-ah te Mipa voter aiin Hmeichhe Voter an tam zawk a. Draft Roll hmasa aiin Voter 1673 in apunga a punna hi za zela 1.9 a ni.  District chhungah  Polling Station 137 awmin, Polling Station 1 ah voter 630 awm zel ang a ni a. MLA Constituency zingah 23-Champhai North-ah voter 18895 awmin a tam ber a, 25-E. Tuipui-ah voter 15165 awmin vote nei  tlemna ber a ni.

Polling Station malah chuan Voters 1202 awmna 24/12-Champhai Vengthar, 24-Champhai South A/C ah vote nei an tam ber a, 21/24- Taitawkawn, 21- Lengteng Assembly Constituency-ah voter 62 awmin a tlem ber a ni. Kum 18-19 inkar vote nei mi 5711 an awm bawk a ni.

Election Commission of India in a ruahman angin Special Summary Revision of Electoral Roll 2019 neih zawh tak atanga dilna hrang hrang te leh siamthat ngaite chu chin fel anih hnuah  Final Roll hi tlangzarh a ni a. A hranpaa Electoral Roll tihchhuah duh tan Soft Copy copy khat Rs 100/- leh Hard Copy phek 1 Rs 5/- zelin Election Office-ah a lei theih a ni.