Kumina Lok Sabha Inthlanpui 2019 neih tura hman tur, Lawngtlai District-a assembly bial pathuma Final Electoral Roll chu vawiin khan Lawngtlai District Election Officer, Lawngtlai Bawrhsap ni bawk Pi Shashanka Ala, IAS chuan a office chamber-ah a tlangzarh.

Pi Shashanka Ala chuan roll tlangzarh tak dinhmun tlangpui a sawi a. A hun taka tlangzarh theiha peih fel a ni chu lawmawm a tih thu sawiin, chumi atana chhun zan zawma thawktu Electoral Registration Officer (ERO)-te, Election Officer (EO)-te leh staff zawng zawng chungah lawm thu a sawi a. Final roll tlangzarh tak chu political party hrang hrang ai awhte hnenah an lo zir chian atan a sem nghal.

Final Electoral Roll-ah hian 36-Tuichawng (ST) A/C bialah vote nei mipa 15868 leh hmeichhia 15547, an vaiin mi 31415 an awm a; draft roll aia a punna hi 830 (2.7%) a ni. 37-Lawngtlai West (ST) A/C bialah vote nei mipa 13473 leh hmeichhia 13363, an vaiin mi 26836 an awm a; draft roll aia a punna hi 710 (2.7%) a ni. 38-Lawngtlai East (ST) A/C bialah voter mipa 11645 leh hmeichhia 12383, an vaiin mi 24028 an awm a; draft roll aia a punna hi 514 (2.2%) a ni. Lawngtlai District-ah hian a pumpuiin vote nei mipa 40986 leh hmeichhia 41293, an vaiin mi 82279 an awm a; draft roll a?angin voter 2054 (2.6%)-in an pung a ni.

Lawngtlai District final roll-a hming chuang zawng zawng hian Elector's Photo Identity Card (EPIC) an nei vek a. Polling station pakhata voter tamna ber chu 36-Tuichawng biala 36/39-Longpuighat P/S niin, voter 1241 an awm a. Voter tlemna ber polling station chu 37-Lawngtlai West biala 37/62-Chamdurtlang II P/S niin, voter 72 an awm.

Final roll tlangzarh taka hming chuang lo, vote nei thei site chu March ni 14 thleng thun belh theih a ni dawn a. Final roll-a tihsual palh siam that nan leh thun belh ngai thun belh nan March ni 2 (inrinni) leh ni 3 (Pathianni) te hian polling station tinah special camp buatsaih a ni ang a. Hetah hian Booth Level Officer (BLO)-te chu Form 6, 7, 8 leh 8A te nen thuin, siam that ngai apiang an lo buaipui zel thei dawn a. Lawngtlai DEO chuan he special camp hi mipuite'n chhawr tangkai a, India khua leh tui dik tak kum 18 tling chin, roll-a la chuang si lote chu roll-a lut ngei tur leh EPIC nei tawh zawng zawng pawh roll-a an chuan leh chuan loh enfiah vek turin a ngen a ni.