Mizoram in Remna leh Muanna kum 25 lai a neih pualin Exhibition pui tham tak Aizawl ah butsaih a ni dawn.

Hemi chungchang ngaituah hian Chief Secretary Pu Vanhela Pachuau hovin Sorkar mi pawimawh – Commissioner te, Secretary te leh Department hotu lute chu vawiin khan Secretariat Conference Hall-ah an thukhawm a. Vawiin a an rel tlangpui te chu – he Exhibition hi ni thum chung January ni 24 – 26, 2012 hian New Secretariat tual zawl ah neih nise an ti a. Exhibition-ah hian Sorkar Department hrang hrang hmasawnna lam khawih bik ten kum 25 kalta chunga an hmalakna leh hlawhtlinna hrang hrang pholang sela, Sorkar enkawl PSU leh Sorkar laipui hnuaia awm – BSNL, RIPANS, AIR, DDK leh DOEACC te pawh tel tura sawn nise tiin a rel a. Thil chi hrang hrang phona tur pindan (stall) za aia tlem lo buatsaih ni sela, hei hi Industries Department in lo hma se tiin thukhawm chuan thutlukna a siam bawk.

Mizoram in rambuai atanga Remna leh Muanna ah neih kum 25-na hi hman mek a ni a. Mizoram Assembly ah pawh July ni 7, 2011 khan Parliamentary Affairs Minister Pu Lalsawta put luh in official resolution - passed a lo ni tawh a. Official Resolution chuan he Remna leh Muanna hi chhung lam leh pawn lam atanga tihchhiat anih lohna turin mipui zawng zawng ngen nise tih a ni.