Mizoram in Remna leh Muanna ah neih kum 25 a tlin puala ni li chhung (January 24 – 27) exhibition ‘Celebration of 25 Years of Peace – Cum – Exhibition’ New Secretariat Complex Ground ah buatsaih chu vawiin tlai khan Mizoram Governor Pu Vakkom Purushothaman’n a khar. Kharna inkhawm Chief Secretary Pu Van Hela Pachuau IAS kaihruai ah hian Chief Minister Pu Lal Thanhawla, a nupui Pi Lal Riliani, Minister leh Parliamenary Secretary thenkhat leh Sorkar senior officer thahnem tak an tel a ni.

Governor chuan Exhibition hi Republic Day nen intawng a, neih a ni chu, an in rem hle a hriat thu sawiin Sorkar Laipui leh MNF ten remna thuthlung an ziah chu Mizoram history ah chuan mel lung chhinchiahthlak em em a ni a ti a. Remna thuthlung kan hriatnawn fo a tul a ni tiin hei hian thangthar nunah thuthlung hlutna hi kan hriattir thei bakah remna leh muanna in thil tha tam tak a ken kan in zirtir thei dawn a ni a ti a. Governor chuan remna leh muanna chu Mizoram chuan awl aia lo takin a nei a tiin hemi kawnga Kohhran in palai hna a thawh chu ropui a tih thu a sawi a.

Governor chuan Hnampa Mahatma Gandhi in a sawi angin Khawvel a remna awm tur chuan a chhunga cheng mihring ten remthu an rilru ah an put phawt a ngai a tih angin Mizo mipuite pawhin Mizoram a remna leh muanna ah awm theih nan leh an rilru zawng zawng sengin, remna a len theih nan an thawhhlawk ber a ni a ti a. Governor chuan Mizoram chu Hmarchaka state tenau nimahsela Ram pumah remna leh muanna awm tur chuan a chhunga cheng mipui ten remna an duh anih tih leh remna leh muanna chu hmasawnna nen an in kungkaih tlat anih ti chiangtu a ni a ti. Governor chuan Thlai lehkhathiamte chu an lehkha zir mil a Mizoram ah hna a van tawh avangin Sorkar chauhva innghat lovin Ram chung hmun dangah te hna thawk hreh loh turin a chah a ni.

Chief Minister Pu Lal Thanhawla pawhin thusawiin remna zawnna kawngah hun khrihkhan tak tak karah Kohhran hrang hrang inzawm khawm in hma an lakna chu Mizo mipuiin theihtawp chhuahin an tawiawm avangin remna leh muanna Mizoramin kan nei thei ta a ni a ti. Chief Minister chuan remna leh muanna tel lovin hmasawnna a awm thei lo a ni tiin nimin Republic Day a Governor in Sorkar hmalakna leh hmasawnna hna a thawh mek ti hlawhtling tur chuan mipuiin neitu rilru pu a taimakna, rinawmna leh Pathian tihna nung nen kan dawnsawn thiam a tul thu a sawi a ni.

Kharna inkhawm MKHC Secretary Rev R Lalrinsanga; MUP President Pu K Malsawma ; MHIP President Pi B Sangkhumi; YMA President Pu T Sangkunga leh MJA President Pu H Zosangliana ten thusawina hun an nei bawk a ni. Larsap hian Exhibition a Department titha te hnenah lawmpuina thuziak a hlan bawk a ni.

Exhibition hi mipui an hlut em avangin Sorkar chuan naktuk thlenga pawhsei a rem ti a. Mipui zawng zawng he Exhibtion chim tur hian a sawm nawn leh bawk a ni.