Zoram mipui duhtakte u, Mizoram remna champha kan lo thleng leh ta hial mai a. A lawmawm ka tiin in vaiin chibai ka buk a che u.

Mizoram remna hi 1971 atang khan inremna nei tura theihtawpa beih a ni tawh a. Amaherawhchu a kaltluang thei lova a ruka inbiakna te a awm hnuin 1976 atangin mipui hriatah khawvel hriatah a lang apauva inbiakna neih a ni a. Chumi hnu kum 10 hnuah 1986 ah inremna chu neih a ni ta a. He inremna neih zan hian Mizoram pumpuiah heti tluka inremna lawmna emaw Mizoram mipui hlimna emaw hi a la thleng ngai lo an tih hial khawpin Mizoram kha a awm a ni. Mi tinin rithei tinreng te tumin an inchibai a, hlim em emin kha remna siam zan kha hman a ni a.

Tichuan chu inremna lo thleng chu a chhan ber chu kan political party zawng zawng te, Zoram mipui zawng zawng te, NGO leh kohhran ten theihtawpin Pathian hnenah tawngtainain an dil a. Chu tawngtaina chu Pathianin a chhang a, tichuan, ramhnuaia MNF te leh India Sawrkar chuan June ni 30, 1986 ah inremna an lo sign thei ta a ni. He inremna hi ramhnuaia MNF te duh ang thlapa siam a ni lova, India Sawrkar duhdan ang thlapa siam a ni hek lo. Amaherawhchu, Mizoram mipui te duhdan ang vek pawh ni bik chuang lova Pathianin Mizoram tana tha tawk a tiha a pek; chumi anga inremna chu siam, kan vaia kan sirtluk theihna niin a lang a. Chuvangin he inremna hi Pathian min pek anga Zoram hian he inremna hi nei kan ni tih hi kan ngaih dan a ni.

Mizoram kum 20 chhung India ram zawng zawnga ram buai ber chu remna India ram remna siam tawh zawng zawngah hlawhtling ber. Chu chang chu ni lovin khawvelah pawh a hlawhtling ber te zinga mi niin a lang a. Chutiang chu kan lo thleng ta hi Pathian thilpek Pathian malsawmna liau liau a ni. Kan lawm takzet a. Hei hi kan thenawma Bangladesh-ah te, Burma ah te, India ram hmun dang dangah te, rambuaiin min hual velna karah hian inremna tluantling a tha, kan neih tak hi, hawh u, kan theihtawpin vawng himin Pathian hnenah lawmthu sawi chungin enkawl ngheh i tum ang u.

Tin, chu chauh chu ni lovin he remna min petu hian a pawng lo thlawna min pe naran a ni lo. He ram hi duat taka enkawl a, malsawmna haichhuak a, chu malsawmna neih te chu Zoram mipui tan leh min petu kan Pathian tan hmang turin hei hi min duh avanga hetiang hi lo thleng a ni. Chuvangin nakin zelah pawh he ram malsawmna kan haichhuah tur Pathian malsawmna kan dawn tur te hi malsawmna min petu kan Pathian chanchintha hrilh darh nan, kan Pathian tan hmang turin Zoram mipuiten bat kan nei a ni tih hriain, chumi ang tak chuan, hawh u tun atang chuan kan theihtawpin kan rilru, thalai zawng zawngin, nu leh pa zawng zawng leh Zoram mipuiten nghet takin chu remna thuthlung Lalpan min pekah chuan i dingnghet tlat ang u, tiin he remna champhaah hian mipuite hnenah lawmna thu leh ngenna thu ka’n hrilh che u a ni e.

In vaia chungah lawmthu ka sawi e.