1005/2023-2024

Aizawl, June ni 30 2023: Remna Ni 2023 chu vawiin khan district tinah urhsun taka hman a ni a. Aizawl ah chuan khuallian Chief Minister Pu Zoramthanga hovin Vanapa Hall ah hman a ni.

Chief Minister Pu Zoramthanga chuan Mizoram buaina chhuah dan te, remna nei tura beihna kawng a thui zia leh harsatna te leh vawiin ni thlenga remna leh muanna kan neih tak hi a hlutzia sawiin, he remna hi kan puan zar kan zauh theihna tur leh a mamawhte tana remna palai kan nih ve theihna tura Mizo hnamte Pathian in a pek nia a rin thu a sawi a.

Rambuai a chhuah chhan sawifiahin, Mizoram chu tunhma a undivided India awptu British te'n India ram an chhuahsan dawn a India ramin danpui an siam khan Mizoram a huam tel ve loh, excluded area a nih thu a sawi a. Political party pawh nei ngailo in, 1946 ah party din awih a ni a, 1947 ah India a independent dawn tak si ah khan chutia politics a kum khat chauh a upa chuan mipui an kumkhaw awm dan tur thutlukna an siam a ngaih tak thu leh, chu thutlukna chu mi fing ber tan pawh siam thiam harsa tak a nih thu a sawi a. Ngaihdan chi hrang nga lo awmin - Burma zawm emaw, Pakistan zawm emaw, India a tel emaw, British in la awpin crown colony a awm emaw, Independent a awm te a ni a. Chutah British an kian tak a Mizoram rorelna ruak ta a (political vacuum) karah India sawrkar chu rawn zuanglut ta in, a nih dan turah ngaiin keini chu kan lo pawm mai bawk a, chu chiah chu kan rambuai thu bul chu a ni tiin Pu Zoramthanga chuan a sawi a. Tichuan, India ramin mipui duhthlanna a ram a indinna ram danpui bu an ziah lai khan Mizoram emaw mizo mipuite hriatpui leh tel ve miah lohna a nih dan sawiin, chumi chungchang chu central lam hotu Mizorama lo kal thenkhat te bulah pawh lo sawipuiin, anni pawhin ngaihtuah zui tham nia an hriat thu an sawi a. Chutiang karah chuan lehlamah inrinhlelhtawnna a lo awm a, chumi kal zelah chuan buaina a lo awm chhoh tak dan a sawi a.

Mizoram chu ram buai a puan a nih hnu ah remna leh muanna a awm theih nan a kawng hrang hrang a mi hrang hrangin theihtawp an chhuah dan Chief Minister chuan a sawi a. Tan in a khung hial tawk khawp a kohhran lamin hma an lak dan te, tlawmngai pawl leh political party lam leh mipui inpekna thuk tak te chu fakawm a ti a. Khatih hunlaia mimal taka a thil tawn hrang hrang te sawi bawkin, Mizoram remna hi thil chi hrang hrang lian leh te zawmkhawm hmanga siam, tawrhna kara chung lamin thilpek ropui Mizo mipuite a pek a nih thu a sawi a. Hun kal zela he remna hi remna tluantling a nih zia a chiang zel a, India state dangah pawh remna hi lo ziah fo tawh a nih laiin a tluan tling thei tak tak lo thin a ni a ti a. Mizoram chawilar nan kan kan thil neih hrang hrang zingah midangin an neih ve loh chu kan remna leh muanna hi a nih thu sawiin Chief Minister chuan heihi hmang tangkaia, kan thenawm ram leh state a buaina awm karah remna palai kan nih theih zia te a sawi a. Mizoramin Remna a neih champha a lo thlen hian he kan remna hi midangin a zar an lo zo ve theih nana hma lak tum theuh tura mipui sawmin Remna Ni chibai a buk a ni.

Inkhawm hi Chief Secretary Dr. Renu Sharma chuan kaihruaiin kalkhawmte lawmthu thu a sawi a. Mizoram remna thuthlung ziah vawiin ni thlenga chhawmnun a la nih chhan zingah mipui inpumkhatna leh mihring dikna chanvo ngaihpawimawh vang te nia a hriat thu a sawi tel a ni.

MKHC Committee Member Rev. Lianhmingthanga Sailo chuan thu sawi bawkin, Mizoram rambuai a puan a nih hnu a remna a awm theihna tura kohhran in hma a lo lakna hrang hrangte a sawi a. Mizorama kohhran te tanghova committee din a hma lak dan hrang hrangte, inbiakna neih dan te, ram hruaitute hnena thu thlen dan te sawiin, remna neih theih nan a ramhnuaia sipai awm te, tlawmngai pawl leh mipui te, khatih hunlaia sawrkar hotute an zavaia an hmalakna leh remna atan chan neih pawi tilo a an inpekna chu ropui a tih thu a sawi a ni.

NGO Coordination Committee Chairman Pu R. Lalngheta chuan rambuai lai hre pha tan chuan remna hlutzia a chian thu a sawi a. Thangtharte'n khatih hunlaia nun ralmuanglo leh ți taka awm hunlai kha tawngin hre velo mahse remna leh muanna chhawm nung zel turin a sawm a. Manipur leh Myanmar atangin rambuai avanga Mizorama rawn raltlan te tuamhlawm an nih dan sawiin, heng karah hian remna hlutzia a lan chian thu a sawi a. Kan rama remna leh muanna kan neih mek hi hlut nachang kan hriat a pawimawhin a ngheh leh zual theih nan țangthar leh mipuite a sawm a ni.

Kumin June thla chhung hian sawrkar ruahmanna in Remna Ni pualin thisen pek runpui te, khawtkang tihfai hnatlang te, thingphun runpui leh thildang hrang hrang buatsaih a ni a. Thalai leh zirlaite tan intihsiakna department hrang hrang kaltlanga buatsaih a ni bawk a. Chung intihsiaknaa tithla thlanchhuahte hnenah vawiin khan Chief Minister Pu Zoramthanga chuan lawmman hi a hlan a ni:

A. Short Video Making Competition (UD&PA Deptt.):

1st Prize - D Hermonies, Durtlang Leitan South
2nd Prize - Lalremruati, Champhai Vengsang
3rd Prize - V. Lalzamliani, Dawrpui

B. Digital Flyer Making Competition (UD&PA Deptt.)

1st Prize - Lalbiakngheta Ralte, Venghlui
2nd Prize - Lalramsanga, Tuikual South
3rd Prize - Marcus Saihmingliana, Zonuam

C. Painting Competition

Remna Ni 2023 Painting Competition hi Directorate of Information & Public Relations leh Mizoram Art Development Society tangkawp buatsaih a ni. Category 3, Middle School, High School leh Open-ah siam a ni.

(i) Middle School Category :
1st Prize - Joseph Lallawmzuala, Class-VIII, Home Mission School
2nd Prize - Malsawmkimi Pachuau, Class-VII, Gospel Centenary School
3rd Prize - Mary Vanlalruati, Class-VI, Gospel Centenary School

(ii) High School Category :
1st Prize - Hmangaihzuala Chawnghlut, Class-IX, Kid Care School
2nd Prize - Annie Malsawmtluangi, Class-IX, PES School, Durtlang Leitan Zotui
3rd Prize - F. Vanlalpekhlui, Class-X, Home Mission School

(iii) Open Category:
1st Prize - H.D. Lalthanzuala, Bawngkawn
2nd Prize - Samuel V.L. Awmpuia, New Serchhip
3rd Prize - H. Lalchhandama, Ramhlun ‘S’

D. State Level High School Quiz Competition (School Education Deptt.)

1st Prize - Vanlalchhanhimi & Vanlalrova, Presbyterian English School, Khawzawl, Khawzawl District
2nd Prize - H. Lalengmawia & Malsawmzuali Ralte, Baptist Hr. Sec. School, Serkawn, Lunglei District
3rd Prize - Lalhlimpuii & Laldinzuala, Govt. JM High School, Serchhip, Serchhip District

E. State Level Higher Secondary School Essay Competition (School Education Deptt.)

1st Prize - Lalchhanchhuahi, Govt. Central Hr. Sec. School, Aizawl District
2nd Prize - Lalkawngaihsanga, Ardee Diamond Hr. Sec. School, Siaha District
3rd Prize - Lalruatpuii, Kawlkulh Hr. Sec. School, Khawzawl District

Chief Minister hian zanin dar 8 hian Vanapa Hall ah vek Mizoram Zirlai Pawl buatsaihin Remna Ni lawmaah khuallian niin hun a hmanpui dawn a ni.