1227/2026-2027 

Aizawl, the 29th June, 2026: Remna Ni hun pawimawh takah hian Mizoram mipuite June ni 30, 1986 a ziah Mizoram Peace Accord chhinchhiah tlak takin kum 40-na hmel a hmuh pualin duhsakna leh lawmpuina ka hlan a che u. 

He ni hi Mizoram chanchina hun chhinchhiah tlak leh danglamna thlentu pawimawh tak niin, Mizoram zalen, hmasawn leh thang chak siam turin beiseina thar min pe a ni. Kum 40 kaltaa inremna thuthlung ziah chuan kan ramah remna tluantling a rawn thlen a, hei hian hun engemawchen buainain Mizoram a chiah chu titawpin, inpumkhatna, inremna leh hmasawnna lam hawiin bung thar min kaipui ta a ni.

Mizoram tan a ni tih hriaa remna leh muanna a awm theih nana an finna, huaisenna leh inpekna nena thathawhtu zawng zawng - hruaitu hmasa ngaihtuahna thui tak putute, pawl, Kohhran, kum lama upate leh mi hrang hrangte - he ni a lo thlen hian kan hre renga zahna chibai kan buk a. A bik takin Mizoram tana an nunna hlu tak hlantu mi huaisente kan zahin kan hre reng a. An inhlanna leh Mizoram tha zawk siam tura an beiseinate chuan tun thlengin min hnehin phurna min pe a ni.

Remna hi buaina laka fihlimna mai a ni lova, mitin leh ram pum khawsak phung thuk taka nghawng thei thil a ni a. Remna leh muanna tel lovin eng hmasawnna mah hi a kal hlei thei lo a ni. Remna leh muanna chuan mihring dikna leh mipui rorelna chawisangin inrintawnna, dawhtheihna leh inunauna tha a siam a. Tunlai khawvel dan pawisak lohna leh dinhmun inkar zau takah hian lungrual taka khawsak ho tluka hlu a awm chuang bik awm lo ve.

He mellung pawimawh tak kan lawm mek lai hian remna leh muanna hlu tak kan dawn hi duat taka enkawlin tichak deuh deuh ang u. Mizoram khawtlang ruhrel hausa tak hi chhawmnungin vawnghim zel ila. Remna leh muanna dik tak hi hmasawnna hrang hrang - zirna, sum leh pai dehchhuah, hmasawnna ruhrel siam, hriselna, hnam ziarang vawnhim, thil thar chin chhuah, pawisa peipun leh hmasawnna huapzo atantea innghahna bulthum pawimawh tak a ni. Hmabak hlen chhuah tur tam tak kan la neih avangin hmalam pan zel turin theihtawp kan chhuah a ngai a ni.

Remna leh muanna ngelnghet tak kan neih mek hian kum 2047-a India ram hmasawn leh intodelh siam tura inbuatsaihna kawngah awmze thui tak a nei dawn a. Mizoram zalen leh ralmuang hi kan state tan chauh ni lovin India ram pum tana entawntlak leh hlu a ni.

Remna Ni pual hian inremna thuthlung ziahin thil min rochunte hlen chhuah kawngah thahnemngai taka thawk turin intiam theuh ila. India ram hmasawn siam kawnga thawh hlawk tak Mizoram hausa leh hmuingil, inrem leh hmasawn siam turin theihtawp chhuah tlang theuh ang u khai.

Jai Hind.

Remna Ni chibai.