India sorkar, Mizoram sorkar leh Mizo National Front (MNF) ten inremna thuthlung, Peace Accord, an ziah ni champha vawi 25-na lawmna inkhawm ropui takin vawiin khan Vanapa Hall-ah neih a ni a. He inkhawm pawimawh tak hi Mizoram sorkar leh Mizoram Kohhran Hruaitute Committee (MKHC) tangkawpin an buatsaih a, Mizoram chhunga District khawpui zawng zawngah he hun hi hman a ni bawk. He inkhawmah hian Mizoram Governor Lt. Gen (Rtd) M.M. Lakhera, PVSM, AVSM, VSM, Mizoram Chief Minister Pu Lal Thanhawla leh CM hlui MNF President Pu Zoramthanga te an tel a ni.

Governor chuan Remna Ni champha vawi 25-na ah Mizoram mipuite chibai bukin he ni hi Mizoram tana thilthleng pawimawh, hun harsa tak kalpela remna leh hmasawnna kawnga Mizoramin ke a pen tanna ni pawimawh em em a ni, a ti a. Remna hi awlsam taka Mizoramin a neih a ni lova, a mawhphurtuten inremna dawhkan an kil theihna tura kohhran hruaitute thawhrimna leh mipui thahnemngaihna nasa tak vang a ni, a ti a. Khatih hunlaia India Prime Minister Pu Rajiv Gandhi leh MNF President Pu Laldenga ten remna a lo thlen theihnana insiamrem an inhuamna avang khan Peace Accord hlawhtling taka ziah a lo nih theih phah ta a ni, a ti. Governor hian he Remna Ni champhaah hian Mizoram mipuite chu taima taka khawtlang leh ramtana thawka, remna, muanna leh hmasawnna kan neih theihna tura inpekna thinlung thar nei tura sawmin Mizoram hi State dangte mai ni lo, khawvel pumpui tana entawntlakah kan siam thei a ni, a ti bawk. Thu a sawi hma hian MKHC buatsaih Souvenir chu Governor hian a tlangzarh bawk a ni.

He hunah hian Mizoram Chief Minister Pu Lal Thanhawla chuan thusawiin buai hun harsa leh thawpik Mizoramin a tawn chhoh hunlai khan ei leh bar, silh leh fen, khawtlang nun, kawng tin rengah Mizo nun a tlahniam a. Khawtlang nun tlakhniamna chuan Mizote Kristian nun leh thlarau nun thleng in a nghawng a. Thalai tam takin nunna an chan a, hrehawm takin lunginah tam tak an khung bawk a, chung zingah chuan amah ngei pawh kum khat leh a chanve lai tan ina khung a nih ve thu Chief Minister hian sawi a. Rambuai thim chhah takin min kiansan theihna turin ram hruaitute, kohhran hruaitute leh ram mipui zawng zawngin nasa taka tawngtaia Pathian rawn chung zelin mahni hmazawn theuhah theihtawp an chhuah tlang a. Pathianin an thahnemngaihna te malsawmin remna leh muanna Mizoramah a lo thleng ta a ni, a ti a. Chief Minister chuan he Remna Ni champha vawi 25-na ah hian Mizorama muanna a thlen theihnana mi pawimawh em em Prime Minister hlui Pi Indira Gandhi leh Pu Rajiv Gandhi-a te a hriatreng thu leh ram buai avanga nun chan ta te, remna ni hmu pha ve lo te a hriatreng thu a tarlang a. Inhuatna leh phuba lak duhna thinlung tel hauhlova inpumkhatna leh inngaihdam tawnna a lo thleng ta zawk chu lawmawm a tih thu sawiin remna a lo thlen theihna tura hmalatu zawng zawng, ram hruaitute, kohhran hruaitute leh mipui chungah lawmthu a sawi a. Vawiin Remna Ni champha vawi 25-na lo thleng hi Mizo mipui ten inbihchianna atana hmanga, a chhelai siamthatu nih kan tum phawt chuan kan ram hi a dingchhuak ngei ang, Chief Minister chuan a ti a ni.

Thusawitu dang Chief Minister hlui leh MNF Party President Pu Zoramthanga chuan harsatna kara kohhran hruaitute hmathlir thui tak leh tawrhchhelna te fakin Mizorama muanna lo thleng hi Pathian duh dan leh a remruat fel famkim avanga lo thleng a ni, a ti a. Mizoram chu ram buai ber te zing atangin India ram state ralmuang ber a lo ni ta hi Pathian kaihhruaina leh a thiltum tih puitlinna a ni, a ti.

He inkhawm MKHC Chairman Rev C. Lalsangliana kaihhruaiah hian Most Rev Stephen Rotluanga, Aizawl Diocese Bishop chuan hunserh hmangin inkhawm bul a tan a. MKHC Secretary Rev. R. Lalrinsanga'n remna leh muanna a thlen theih nana kohhran hmalak dan report a pe a. Mizoram Governor Lt. Gen (Rtd) M M Lakhera, PVSM, AVSM, VSM, Mizoram Chief Minister Pu Lal Thanhawla, MNF President Pu Zoramthanga, Baptist Church of Mizoram President Dr. K. Thanzauva leh Rev. Dr Lalsawma ten thu an sawi a. Salvation Army Personnel Secretary Major Thanhlira'n lawmthu sawina hun a hmang a, Seventh Day Adventist President Pastor R. Biakthansanga'n tawngtaiin inkhawm hi a khar a ni.

Remna Ni champha vawi 25-na pual hian Information & Public Relations Department chuan Vanapa Hall-ah Photo Exhibition hmuhnawm tak an huaihawt a, mipuiin an hlut hle.

Attachment

  • Loading attachment...