Vawiin Remna Ni champha phak kum 25-na chu Peace Accord MNF Returnees Association (PAMRA) chuan Engineers' Club, Babutlang-ah an hmang a; Khualtha-ah Art& Culture Minister Pu PC Zoramsangliana leh Social Welfare Minister Pu PC Lalthanliana ten an hmanpui.

Pu PC Zoramsangliana chuan "Remna Ni-ah hian lei leh vana remna thlentu Lal Isua hi kan nun kaihruaitu atan i hmang ila; hemi ni hi kan rilruah ram leh hnam hmangaihna kawnga inpek tharna Ni a ni tur a ni. Chumi rual chuan kan hnam pasalthate inpekna kha i ngaihlu ang u" a ti.

Pu PC Lalthanliana chuan, "PAMRA hi political party pakhat ta bil a ni lo a;thangtharte hnena remna hlutzia min hriat thar tirtu tur pawl pawimawh tak a ni. Remna hi a man a to a, a vawng nung turin Mizoram mipui zawng zawngten theih tawp kan chhuah reng a tul a ni" a ti.

PAMRA chuan an member-te zinga tu leh fa zirna kawnga hlawhtlingte hnenah chawimawina an hlan a; Remna Ni pualin zanriah an buatsaih nghal.