Ka Mizopui duhtak te leh Mizoram khua leh tui te, Mizoramin Remna leh Muanna champha vawi 25-na Silver Jubilee tluang takin kan lo thleng thei ta der mai a, a lawmawm takzet a, min kaihruaitu Pathian hnenah lawmthu ka sawi a ni. Tin, India ramah State ralmuang bera ngaih kan han ni leh nghal te hi a ropui takzet a, Remna leh Muanna kan neih theihna tura thawktu zawng zawngte leh kum 25 tluang taka min kaihruaitu Pathian hnenah lawmthu ka sawi a ni. Remna leh Muanna tel lo chuan mihring nun hi a zalen lova, a him lova, rambuai kum 20 kan nih chhungin tah leh hathialna, thihna, Mizo leh Mizo inbeihna, tamna, in leh lo channa nasa tak kan tawk a, kan khua atangin ranrual angin khalh khawm kan ni a, khaw tharah kan kai a, tanpuitu leh enkawltu nei lovin kan awm a. Tin, sipai ten ram awp ang maiin min enkawl a, chumi hnuah chuan harsatna nasa tak kan tawk a, Mizo tlangval, nu leh pa hmeichhia, mi a nilengte nen lam a za tel, a sang tel lung inah kan tang a. Chutiang chuan hrehawm tinreng kan tuar a. Eizawnna kawng tinrengah kan tlahniam a. Ei zawnna kawng tinrenga kan tlakhniam chuan silh leh fen, khawtlang nunin a lo tuar a. Khawtlang nuna kan tlakhniam chuan Kohhran nunah, Kristian nunah kan tlahniam a, kan Kristian nuna kan tlakhniam chuan kan khawvel piah lama kan thlarau nun thlengin a nghawng vek a ni.

Ram buai laia sipaiten kan Biak In te an tih bawlhhlawh a, curfew karah Biak In dar a rik khat raih laiin thlarau lamah a nghawng harsa hle a ni. Chutiang chuan harsatna tinreng kan tawk a, sawrkar hnathawkin rambuai avangin sawrkar hna an thawk thei lova, sumdawng hovin sum an dawng tha thei lova, zirlaiten an zir tha hlei thei lova. Tin, thingtlang mipui kut hnathawk leh lo neiha eizawngten ram riah khap avang te, curfew avang te, checkgate avangte in hma an la thei lova. Mizo mipui kan buai a, harsatna namen lo kan tawk a, rethei bakberhin kan awm a, eizawnna kawng tinrengah kan rahbi a tleu a ni. Chutiang hun hrehawm leh hun khirh chu tunlai thangthar tam berte chuan an hre phak ve tawh lova, a tute mai pawh kha upa in tuboh leh dolung inkar an tih angah kan cheng a ni ber mai. Chutiang hrehawm tak atang chuan kan Kohhran hruaitute inzawmkhawmin hma nasa takin an la a, kan Politic pawl hrang hrang te pawhin hma an la. Tin, tangkai nia in hria tam takin tangkai thei tura awm anga an inhriat dan dan in mahni thiam thiamin hma an la a. Eng pawh nise a bul berah chuan vawiina awm ta lo Prime Minister Pi Indira Gandhi bul tanna a ni a, nasa takin hma a la a, a-ni hi kan hre reng a, tin, a hnuah a fapa Pu Rajiv Gandhi-an theih patawp a chhuah a remna leh muanna kan neih theihna turin kan thurawn te a pawmin tiang hian hma nasa takin a la chho va, Kohhran hruaitute pawhin tul an tih hun apiangah hmuh theihin a awm a ni. Chutiang chuan a thei apiangin hma kan la chhova. Tichuan, Remna leh Muanna kan neih theihna turin Inremna thuthlung Peace Accord kan tih hi June ni 30, 1986 zan dar 9:15 velah ziah a lo ni ta a ni. Hemi Zoramin kan han hriat chuan kan awmna apiangah MNF unaute pawh Bangladesh ramhnuaia an awmna ah te hlim in kan lam a, kan auva a tam berin Pathian nung hnenah lawmthu an sawi a tiang chuan theihpatawpin thiam ang angin kan lawm hlawm a ni. Vawiinah hian Remna kan neih theih nan hian chutih lai sorkar te chuan an sorkar namtlu in Lal thuthleng te an ken hial a tul a. Chutiang chuan Remna leh Muanna kan neih man hi a to hle a ni. Chuvangin he ramah hian Remna leh Muanna a awm reng theihna turin a tute mai pawh hian ram leilung fa tawh phawt chuan mawh kan phur a ni tih hriain he Remna

leh Muanna hlu tak mai Pathianin min pek hi kan vawn him reng theihna turin, theihpatawpa tan kan lak a tul a. Remna leh Muanna tello chuan hmasawnna tluan tling a awm thei lova; tin, Remna leh Muanna tello chuan nun a zalen lova, nun a him thei lova chuvangin Remna leh Muanna man to taka lei chhuah, kum 20 tal tawp tah leh ha thialna kan tawrh hnua hetianga zalen taka India ramah ram ralmuang ber kan lo ni thei ta te hi a lawmawm takzet a. Hemi atana thawktu zawng zawngte chungah lawmthu ka sawi a, tin, hnam sipai tam tak ram leh hnam tana an nun nen, thiamna nen lama nunna maicham a hlan a tuarta te pawh kan hre reng a. Vawiina Remna leh Muanna kan neih champha ah hian. Tin, hemi atana thawktu zawng zawngte pawh kan hre reng a, chuvangin vawiin lawmna ni ah hian mi zawng zawng Pathian hnenah lawmthu sawia Remna leh Muanna thlazar hnuaiah kan ram hi chak taka Development kawng tinrenga kan kalpui theihna tur atana dil turin leh tanla turin ka sawm che u a ni. He Remna leh Muanna kan neih champha kum 25-na ah hian ka Mizopui zawng zawngte Zoram chhung leh pawna mi leh Zoram khua leh tui zawng zawngte chibai ka buk che u in duhsakna ka hlan che u a ni.

Ka lawm e.