Vawiin chawhnu dar 1.00 khan Chief Secretary's Conference Hall-ah Remna Ni champha phak vawi 25-na (Silver Jubilee) lawm dan tur relin meeting neih a ni a. He meeting hi Pu K. Lalnghinglova, Secretary, I&PR Department chuan a kaihruai a; meeting-ah hian Mizoram sawrkarin member tura official a ruatte leh Mizoram Journalists' Association te, Central YMA leh Mizoram Kohhran Hruaitute Committee aiawhte an tel a ni.

He meeting hian Remna Ni vawi 25-na chu Aizawl-ah leh District khawpui zawng zawngah hman ni se tiin a rel a; Aizawl-ah chuan Mizoram Kohhran Hruaitute Committee (MKHC) in Vanapa Hall-a Remna Ni puala inkhawm a buatsaih chu tawmpuiin, a hranpa a inkhawm huaihawt a ni lovang. District khawpuiah chuan Deputy Commissioner kaihruaina hnuaiah REMNA Ni hi hman tur a ni a; sum senso tur cheng nuai khat singnga theuh pek an ni ang. REMNA Ni pual hian AR Ground-ah Mizoram Football Association nena tangkawpin football match buatsaih tum a ni a; I&PR Department chuan Vanapa Hall-ah hemi ni hian Photo Exhibition a buatsaih ang. Remna Ni pual hian Chief Minister Pu Lal Thanhawla chuan 29.6.2011 zanah Doordarshan Kendra, Aizawl atangin thuchah a sawi ang a; Rev. C. Lalsangliana, Chairman, MKHC chuan 30.6.2011 zing karah All India Radio, Aizawl atangin Remna Ni puala thuchah a sawi bawk ang.