Vawiin khan Kolasiba St. Josephs Parish Hall-ah Remna Ni, kum 25-na phur taka lawm a ni a. A lawmna pual hian Photo Exhibition neih nghal a ni.

Remna Ni lawmnaah hian Kolasib DC, SP leh Kohhran hruaitute bakah Political party te, Sawrkar hnathawkte an kal tha hle a. Thusawitu hrang hrang ten Mizoramin Remna leh Muanna a neih hlutzia te, hun lo kal zela thang leh thar ten an hlut thiam zel an duh thu uar takin an sawi a ni.

Mizoram Kohhran Hruaitu Committee, Kolasib aiawha thu sawitu MKHC Chairman Pastor C.Lalrintluanga chuan Remna tluantling kan rama a awm theihna tur chuan nitina kan nunah Remna siamtu nih kan tum tur a ni, a ti a. A duhtu mai nil ova midangte remtu, politics thilah leh sawrkar thilah kan nih a tul a ni, a ti.

Thusawitu dang Pi Niharika Rai, IAS, Dy. Commissioner chuan Mizoramin Remna a neih hi ram dang leh hnam dangte thlirna atang chuan a sang hle a. Mizorama ka thawh hnu hian zawhna ka dawn tam ber pawh "A ram a ralmuang em ?" tih a ni fo thin. State ralmuang leh nuam tak a ni tih chhuang takin ka sawi fo thin a ni, a ti. Mizote nunphung leh zia hian min lem a, a rukin ka zir thin che u a ni, a ti a. Pi Rai chuan Mizoram Remna ziah lai khan naupang chumchiap mai kala ni nain vawiinah he ram nuam taka DC kalo ni thei mai hi ka lawm takzet a ni tiin Thangthar zel ten Remna hi I vawng nung zel ang u, a ti a ni.

Congress party aiawhin Pu Chhuanvawra, Jt. Secy, Kolasib Block in thu a sawi a. MNF aiawhin Pu Lalzawmmawia, President, MNF Block in a sawi bawk.

Remna Ni puala buatsaih Photo Exhibition/Competition chu Pi Niharika Rai, Dy. Commissioner chuan a hawng a. Mimal thahnem takin hetah hian SLR, Compact leh Mobile hmanga thlalak te an entir a. Heng Category pathumah te hian lawman siamin lawmman tehi Pi Raiin a hlan hlawm a,mipui hlut a hlawh hle a ni.. Hnam lam leh Zai chi hrang hrang entira ngaihthlak a ni bawk a ni.

Tarlan tawh angin remna Ni denchhen hian Kolasib Dist. Jail amite eitur Sa leisak an ni bawk a ni.