Vawiin dar 11:00 AM khan Champhai Venglai Community Hall-ah Remna Ni kum 25 na Silver Jubilee lawm a ni a, Champhai District MPF President Rev. Rammawipuia'n inkhawm hi a kaihruai a ni.
Champhai North Bialtu MLA Pu TT Zothansanga, party hrang hrang aiawh tura ruat chuan thusawiin khawvelah hian Ram ropui zawk ten ram tenau leh chak lo zawkte run in an awp bet thin a. Colony tam tak an siam a, mahse kum 1930 atanga 1960 chhung khan Independent an hmu leh deuh vek a, hetih hunlai 1961 khan Pu Laldenga chuan MNF party dinin Independent neih duhna thinlung an pu a, 1966 February 28 zanlai atangin Rambuai kan lo ni ta a, 1967 January ni 2 atangin khawkhawm kha a lo intan leh ta a ni, a ti. Pu TT Zothansanga chuan khang hun lai kha a hrehawm em em a, V/C te pawhin khawtlang hmasawnna tur an rel pha lova, tumah inhek loh tur, tih kha an rel theih chhun a ni mai a. Dan a awm lova, sipaite rorel dan kha kan rama Dan awmchhun a ni mai a, mipa zawng zawng an khawm a, chumi hlanin kan hmeichhia te, raipuar chenin min pawngsual sak a, zan lamah chauh ni lo, chhun lamah te pawh curfew kan ni a, tih luihna in min chhawr a, ramhnuai ki nia an rinhlelh te chu dimna tel miah lovin an sawisa a, mi tam tak an tual thi a. Hetianga kan ram hrehawm taka kan awm avang hian Kohhran ho an mangang a, Remna leh Muanna kan neih theih nan hma an la tan ta a, vawi tam tak palai hna an thawk a, chutihrualin political party zawng zawngin Remna leh Muanna Policy an nei vek a, MNF support apiangin sorkar-na an siam thin a ni. Kum 1984 Assembly inthlanah khan Congress party chuan sorkar-na an siam a, an intiam ang ngeiin June 30, 1986 khan Remna Thuthlung ziah a ni a, Remna tluantling kan lo nei ta a ni, a ti.
Kohhran hrang hrang aiawha thusawitu Rev. Thangthuama chuan Remna hi a hlu a, a ti chhetu an awm kan phal lova, tih chhiat kan phal hek lo. Khawvel in Remna a tih chu inremlote inremna hi a ni a. Kan Bible in Remna a tih chu a tha ber induhsakna hi a ni, chumi thleng phak tur chuan Kohhran tinin hma i la ang u, a ti. MUP aiawha thusawitu Pu R. Chalbawia chuan Rambuai kan nih avang khan Mizoramin kawng tam takah kan tuar a, mahni dinhmun tur thleng pha zo lo tam tak an awm a ni, a ti a, tunah chuan Remna leh Muanna hnuaiah hmasawnna kawng kan zawh chho ta mup mup a, hei vang hian Remna kan neih hlu tak hi tih chhiat kan phal tur a ni lo, a ti. Champhai District MPF Secretary Pu C. Lalremliana chuan Mizoramin Remna a neih theihna tura Kohhran hmalak chhoh dan kimchang takin a tarlang bawk.
Remna Ni hmannaah hian Sub. Hqrs. YMA President Pu PC Zohlira kaihruaina in kalkhawmten thutiam an nei a. "Mizoram Remna ni champha vawi 25 na ah hian mi zawng zawngte inrem taka kan awm theih nan leh Remna leh Muanna tichhe thei zawnga chet lakna do tlat turin ka intiam e" tiin kalkhawmte chuan an ban dinglam pharin an intiam a ni.
He meeting ah hian Champhai DC Pu Vijay Kumar Bidhuri-an thuchah sawiin lawmthu sawina a nei nghal a, zaithiamte leh bial zaipawl ten kalkhawmte zaiin an awi reng a ni.
