Remna Ni vawi 25-na chu Mamit Chhimveng YMA Hall-ah urhsun takin lawm a ni a. Lawmna inkhawm hi Pastor C. Lalthanzara, Chairman KHJC-Mamit in a kaihruai a ni. Hunserh Rev K . Lalduhsanga UPC(NEI) in hmangin Tanna hla Mamit Pastor Bial Zaipawl-in an sa bawk.

He hun Remna ni lawmna-ah hian Pu Zothankhuma IAS District Bawrhsap Mamit chuan thusawiin Kum 1966 a MNF in zalenna an sual a, hei hian Mizo Society-ah harsatna namen lo thlenin pawngsual, tualthat leh tam te kan tuar a ni ti a, Kum 1986 ah erawh chuan Remna kan lo nei ta a, a lawmawm takzet a ni a ti bawk, Bawrhsap chuan UT hun lai atangin dik lo taka sum lakluh duhna thinlung kan neih thin thusawiin chutiang rilru chu tuna kan thalaite hian kan paih bova, kan hnathawhrah chauh kan rinngam a pawimawh a ni a ti. NLUP hmanga mi harsate chhanchhuahna tura Sorkar hmalakna a nihna tur anga hmang lote kawng dik kawhhmuhtu ni turin Tlawmngai Pawl hrang hrangte a chah bawk a ni.

He hunah hian Pu Zatluanga Sailo, President Sub.Hqrs YMA Mamit District pawhin thusawiin zalenna kan neih hi a hlu a, zalenna hmang thiam lo kan nih leh nih loh pawh kan inngaihtuah a tul hle a ni a ti a. Ruihtheih thil chi hrang hrang, AIDS leh ram dang miten min run mekna atanga kan tal chhuah theihnan thalaite theihtawp chhuah turin a sawm bawk a ni.

Pu Lalhlupuia,Chairman, Joint V/C, Mamit pawhin thu a sawi bawk. Remna Ni lawmna-ah hian Sub-Hqrs YMA Zaipawl, Hmunsam Pastor Bial Zaipawl leh SSA Pipe Band ten zaiin mipui an awi a ni.

Remna Ni lawmna atana chanvo hrang hrang neite hnenah lawmman sem a ni a, Pu Zothankhuma IAS District Bawrhsap-in lawmman te hi a hlan a ni. Rev V. Laltanzuala BCM Mamit-in lawmthu sawi tawngtaina neiin hun tawp malsawmna in Remna Ni lawmna inkhawm hi khar a ni.

Remna Ni vawi 25-na lawmna ah hian Sorkar hnathawk, tlawmngai pawl hrang hrang, MHIP, YMA, MUP te mi thahnem tak an tel a ni.

Vawiin Remna Ni zingkar-ah hian Remna kawngzawh Mamit khawpui-ah neih a ni a, He hunah Mamit khawpui chhunga Sorkar hnatawk tlawmngai pawl hrang hrangte, Khawtlang hruaitute zathum chuang laiin kawng hi an zawh a ni.

Attachment

  • Loading attachment...